Ikas penyalah makai suap majak nambah Pia mega, ikas tranparansi, iya nya pengelurus ngereja pengawa pan majak enda manah

KUCHING: Menteri ba Opis Kepala Menteri (Integriti enggau Ombudsman) Datuk Talib Zulpilip netapka ikas penyalah makai suap di menua tu majak nambah.

Nambahka nya ku iya, ikas tranparansi, iya nya pengelurus ngereja pengawa pan majak enda manah.

“Tajapan enda mudah, kitai meseti berakup lalu ngemunas penyalah makai suap tu.

“Sebut enggai ba pengawa makai suap lalu kitai ngelaban ulah ke enda manah tu,” ku iya.

Talib mansutka jaku nya ba pengawa ngangkat sumpah nyeliah ulah makai suap Serakup Pengawa Gudang Malaysia (FMM) ke diatur di seiti hotel ditu, kemari.

Iya nambah, menua tu engka manah agi rikut (ikas penyalah makai suap) enti dibandingka enggau menua bukai ke besemak.

“Tang kitai dibaruh Singapora, ba menua nya penyalah makai suap nyauka manggai ba ikas kusung.

“Berindik enggau nya kitai meseti nginsur manah agi ari ke udah lalu meseti dikereja diatu,” ku iya.

Dulu agi ari nya, Chairman FMM Othman Abdul Rani madah pengawa kemari mandangka komitmen FMM ngelaban keruga penyalah makai supa di Sarawak.

Pengawa ke diadu ba mua raban pemesai ari Opis Penyeliah Penyalah Makai Suap Malaysia (SPRM) ku iya deka nentuka dagang di nenegri tu dipejalai enggau lurus enggau integriti.

Ba pengawa nya, raban komiti FMM bisi mega nyain ‘En-Bloc’ SPRM ke dikemata Talib enggau Direktor SPRM Sarawak, Sapit Komisyenar Razim Mohd Noor.

Tajapan enda mudah, kitai meseti berakup lalu ngemunas penyalah makai suap tu. Datuk Talib Zulpilip Menteri ba Opis Kepala Menteri (Integriti enggau Ombudsman)