PPIS minta agih RM2 juta ari Perintah Nengeri
SIBU: Gerempung Pengelikun Orang Betanam Betupi Iban Sarawak (PPIS) ngarapka perintah nengeri ngungkupka sida RM2 juta dikena sida bejalaika tuju penumbuh gerempung.
Ketuai Direktor Nengeri/ Palan PPIS Jocky Jim Ungka madah, semua pelin enggau kuing penumbuh PPIS ti nyaup ngangkatka penatai pemisi rayat ulih dipenyadi dalam kandang 15 taun ti deka datai.
“Kitai bisi merambu ngaga beberapa bengkah projek besai bekaul enggau industri betanam betupi ti dipelabaka deka bekenaka ungkus sepenyampau RM2 juta.
“Ketegal pengeransing tu kitai deka ngangjung peminta geran RM2 juta ngagai perintah nengeri,” pia ku iya madah sepengudah aum begulai enggau Opis Betanam Betupi Sibu, kemari.
Aum nya betuaika Pemesai Opis Betanam Betupi Sibu, Heidylia Joshua.
Nambahka jaku iya, Jocky enda nyalam PPIS ke diatu naka penatai belajar lalu sida deka betemu enggau Kepala Menteri Datuk Patinggi Abang Johari Tun Abang Openg.
Iya madah, maya ke betemu ila sida mega deka mantaika ngagai Abang Johari nama perambu enggau pelin sida ba pengawa betanam betupi.
“Dini endur enggau kemaya deka dipadah ngagai media ila nyema pengingin ati kami tu dikemendarka Opis Kepala Menteri,” ku iya nerang.
Ba pekara bukai, Jocky maya tu bela madahka diri berasai enda lantang ati laban bisi piak meda gerempung sida enggau peragam ke enda manah.
“PPIS siti gerempung ke ditumbuh ungkup semua pupu raban bansa.
“Aku enda lantang ati laban bisi orang enda beratika pemanah tuju kami dalam PPIS,” pia ku iya sambil ngelaluka penatai semua bela ngaul diri enggau PPIS seraya besaup ngangkatka sektor industri betanam betupi di Malaysia ngagai tikas ke manah agi.
Ba aum ke diatur nya kemari, beberapa bengkah pekara bisi dirandau baka pemayuh buah maya musin buah enggau piak Opis Betanam bela minta PPIS ngira orang meli tauka orang tengah nyaup orang bejual buah ba menua tu meli buah sida ngambika enda rugi.
PPIS mega maya tu bela mantaika perambu sida ti deka ngaga kus betanam betupi ngagai semua raban PPIS sereta mantaika langgur penemu PPIS bekaul enggau sektor betanam betupi di Sibu alai Heidylia maya nya besetuju deka numbuhka kaul enggau piak sida.
Ba pekara bekaul, Jocky maya tu madahka PPIS deka ngaga produk pemakai ti bekenaka buah dikena sida nyaup ngangkatka penatai pemisi orang betanam betupi menua tu.
“Perambu deka dibai kitai ngagai Institut Pemansik enggau Pemansang Betanam Betupi Malaysia (MARDI),” ku iya madah.
PPIS udah nyiri Barat Intai nyadi Direkter PPIS Sibu enggau Madeline Manggah nyadi sekretari iya.
Pangku pengawa seduai dikemendarka Yang di-Pertua PPIS, Bari Ubi.