Judan dipilih nyadi tuai rumah baru Sungai Dabai
MARUDI: Judan ak Selin, 60 dipilih nyadi tuai rumah panjai baru ke genturung pendiau Rumah Panjai Sg Dabai, kemari.
Judan mujur ngalahka empat iku chalun tuai rumah bukai ke bela bisi kena minta pilih ba pengawa milih tuai rumah panjai nya, ke besaksika Penghulu Randi Bundan ke nyadi penyamin, dipadu ulih Opis Pelilih Menua Marudi, ditu.
Rumah panjai Sg Dabai ke ngembuan 47 pintu, 6km ari pasar Marudi ngaga pengawa milih tuai rumah baru nganti tuai rumah sebedau tu, Lansam ak Jalak ke madahka diri badu mangku pengawa nyadi tuai rumah ketegal umur iya ke majak tuai.
Judan nyadi orang ti dikedaka nganti mentua iya, teulihka 24 undi, lalu ditangkan semak ulih Mudin ak Seli (15 undi), lalu Arriyan Jeringai enggau Usat Resa semina bulih 2 undi seiku.
Ba lansa bukai bekait enggau pengawa milih tuai rumah, iya nya Sg Muam ke ngembuan 39 pintu, alai tuai rumah sida iya empu, Damu ak Ancheh ke udah nadai taun siti nyin tadi, ngujungka rumah panjai nya ngaga pengawa milih tuai rumah ke baru, besaksika Penghulu Randie Bundan, beratika uchu niang Damu ke biak, Sigan ak Bawin mujur dipilih nyadi Tuai Rumah ke baru lebih iya bulih 16 undi.
Sigan, 26 dipilih nyadi tuai rumah baru Sg Muam, lebuh iya ngalahka chalun bukai, Ugon Dagak (14 undi) enggau Boniface Unchang Sengalang (11 undi).
Ba atur pengawa nya, Randi dalam jaku iya ngelalau kededua tuai rumah tu bekere- jasama enggau mensia mayuh ke diau di genturung pendiau dia, lalu pia mega minta semua sida ke diau di rumah panjai bela meri kerejasama sida iya ngagai kededua tuai rumah ke baru dipilih nya.
Sama bisi enggau ngulu atur pengawa nya, lebih ari 10 tuai rumah ari Mulu sama bisi dibai ngagai pengawa nya.