Rayat di nengeri tu patut nguna genap pengerami alai belajar adat bansa bukai

SRI AMAN: Rayat pupu bansa di nengeri tu patut nguna genap pengerami ke diintu semua nyadi siti pelasar belajar, ngelala budaya enggau adat asal bansa bukai semak agi.

Kaban Kunsil Nengeri (ADUN) Lingga, Simoi Peri madah awak baka tu patut dikena memenah semua komuniti ngusung bala bakih ti ngintu hari besai ngambi belajar silik agi pasal pengerami sida.

“Ambika chunto, pengerami Hari Raya Aidilfitri, Taun Baru China, Gawai Dayak, Krismas, Deevapali enggau pengerami bukai di menua kitai tu bisi penyelai iya empu, lalu semua serak komuniti pupu bansa bisi awak berami begulai nadai ngira bansa enggau pengarap.

“Tu mih penyelai ke amat komuniti Malaysia lalu suah kitai meda ba pengerami ngelalu pengabang, sida ti ngabang ukai semina komuniti ti ngintu pengerami nya aja tang mega komuniti ari bansa bukai,” ku iya.

Iya mansutka jaku nya lebuh bejaku ba Pengerami Ngintu Gawai Raya 2018 diatur Pa- lan Servis Komuniti Pengari Rayat DUN Lingga bepalan di Balai Sri Budiman Sekula Primari (SK) Maludam semak ditu, malam kemari.

Nitih ku iya, ulah begusungka rumah bala bakih bebida bansa patut dikemeran laban ulah baka tu deka nambahka semangat beserakup enggau bebasaka budaya enggau adat asal bansa nya.

Sama bisi datai Pemesai Ngatur Pengawa Sarawak di Pelilih Mit Maludam, Noraini Edi, Kaunsilor Kunjang Nanang, bala ketuai komuniti sereta tuai rumah diau nge- lingi sitak Maludam.

Lansa pengerami nya nerima timbal chukup manah ari peranak enggau penatai lebih 1,000 iku pupu bansa enggau pengarap.

Bemacham rintai program udah diatur berengkah ari pagi nyentuk malam hari nyengkaum pekit ngelinsu nembiak mit, pekit nganyam senupat, pekit karaoke lagu Raya enggau Gawai, chabut tikit benasit, mantaika tanda, pengawa nyuaka setipikit ngenang jasa enggau pemeri ngagai 28 iku orang tuai di Maludam.