SAM minta perintah PH mutar penanggul suntuk ai di Marudi
MARUDI: Berindik ari Perintah Besai ke udah betukar diatu, Sahabat Alam Malaysia (SAM) minta perintah betatika penusah komuniti orang asal ke napi penanggul nadai ngembuan pemun perengka guna ke ulih dikena ke pengelantang pendiau sida iya.
Di Sarawak, Sabah enggau Semenanjung Malaysia, sekeda sitak menua ke mayuh alai orang asal diau, lalu bedau teulihka pemun perengka guna bansa tu baka bekal ai beresi, elektrik, pemeresi sereta pengintu pengerai ke bekualiti, pelajar enggau perengka guna pengangkut ke menyana.
Dalam menua Malaysia ke udah maju sereta moden bansa tu, pekara tu enda tau enda dikemerat sereta digaga enggau lengkas ulih kededua buah Perintah Besai enggau Menua.
Bepelasarka penusah bansa tu, beribu komuniti ke diau di genturung pendiau rumah panjai semak Puyut-Lubok Nibong di Marudi, Baram, gaya pengelantang pendiau sida iya kelalu balat tusah, kelebih agi maya musin kemarau bansa tu.
Ku siku orang ke diau di Puyut madahka mayuh ari rumah panjai dia ngaga pam ai kediri empu ari ‘gravityfeed’, ke datai ari sungai tauka bukit. Bekal ai tu asal iya kena nyendiaka mensia mayuh ke diau di sitak nya, pemisi ai ke ulih dikena ruang bilik betuchi aja.
Taja pia, mensia mayuh madahka penatai ai ari sungai bansa nya nyau majak kamah lalu enda manah ke pengerai sereta tau di irup, tang semina kena betuchi aja.
Tang ba komuniti ke diau jauh ari sungai, semina ngarapka ai kerapa ba semak rumah panjai sida iya, ke semina dikena betuchi aja tang enda ulih di irup tauka kena berapi.
Taja pia, beratika musin kemarau baka kediatu, kualiti ai kerapa pan enda manah, lalu enda ulih alai nyauk ai agi, tang semina ngarapka ai ujan aja, tang beratika musin kemarau baka kediatu, pemisi ai pan majak kurang.
Lebuh bisi nurun ke pasar Marudi, mensia mayuh ke diau di genturung pendiau dia, ngambi ai ngena butul ari paip ke bisi dipasang ba makit Tamu di Pasar Marudi nya.
Ba sebuah genturung pendiau, Rumah Entawan di Padang Kerbau, sekeda ruang bilik nyau bebelika sepuluh kutak ai amat sebulan.
SAM mega nemu pasal penanggul nadai ai beresi ke ditapi ulih mensia mayuh ke diau di rumah panjai di Marudi ari kelia.
Penanggul bansa tu uadh suah dipadah ngagai opis ke megai kuasa, nyengkaum ngagai pengari rayat lebuh sida iya betemu enggau ketuai komuniti. Taja pia, semua sada bansa tu datai ke seharitu lalu bedau dikemutarka, taja pan sekeda genturung pendiau semina 30 minit aja ari Pasar Marudi.
SAM minta kededua Perintah Besai enggau Menua beta- tika pekara tu lalu kemutarka penanggul tu enggau lengkas, lalu SAM mega minta Perin- tah ngemansangka perambu pengawa mekal ai beresi ari batang paip ke dipasang ari Pasar Marudi ngagai genturung pendiau ke enda jauh ari Pasar Marudi tu.