Sarawak ‘equal partner’ lebuh begempung numbuhka Malaysia
KUCHING: Sarawak ngembuan status ke suah disebut ‘ equal partner’ ba menua baru (Malaysia) ke disetuju ditumbuh ba taun taun 1963, ku Menteri Muda Jalai Tebing Pantai Datuk Julaihi Narawi.
Nengah Sempekat Malaysia 1963 (MA63) ke nyadi sebengkah sempekat antarabansa, Julaihi madah Sarawak ngembuan hak ‘istimewa’.
“Hak tu sigi patut dipebasaka semua lalu kitai patut ngembuan otonomi diri empu,” ku iya ba Ramah Tamah Aidilfitri enggau Gawai 2018 N. 17 Stakan ke diatur di seiti hotel ditu, malam ensanus.
Pengerami diatur Kaban Kunsil Nengeri ( ADUN) Stakan Dato Sri Mohamad Ali Mahmud lalu bela digulu Kaban Parlimen (MP) Samarahan Rubiah Wang enggau ADUN Muara Tuang Datuk Idris Buang.
Berindik enggau nya, Julaihi ke mega ADUN Sebuyau madah sebarang hak ke udah lenyau ba sepemanjai timpuh 55 taun Malaysia udah ditumbuh patut diambi pulai baru.
“Engka kitai enda ngasai diak hak kitai Sarawak lenyau belelubah nyentuk ke kitai nyadi seiti kandang ke sama enggau nengeri bukai di Semenanjung Malaysia.
“Ba hak ke udah lenyau baikka nya chara sengaja tauka enda, kitai patut nanya sapa ke patut ngarika kitai ba atur ngambi hak nya pulai.
“Udah tentu kitai deka madah nadai orang bukai kelimpah diri kitai empu lalu tanggungpengawa nya diserah ngagai Perintah Sarawak ke diatu ke udah dipilih rayat,” ku Julaihi.
Iya nambah, Perintah Sarawak ti diarika Gabungan Parti Sarawak (GPS) ngembuan 100 peratus komitmen ngintu pemaik enggau hak nengeri.
Chunto ke nyata iya nya ba sentang kes minyak enggau gis ke dibai Petronas ngagai kort bedau lama tu tadi.
“Semua kitai udah macha sentang pekara ke nyadi ke alai Petronas mai isu minyak enggau gis ngagai kort.
“Kitai ngenanka hak kitai ba kort lalu ba renggat keterubah kitai udah ngalahka Petronas.
“Pekara tu mandangka kitai ngembuan pengeran ngenanka minyak enggau gis lalu pengeraja asal nya sigi patut empu kitai,” ku iya nandu.
Ngenang kaul ke sama, Ali ba jaku pengelalu pengerami madah MA63 mengkang sah tajapan Singapura ningkilka diri bedau lama pengudah Malaysia ditumbuh.
Iya ngelalau semua peranak Sarawak berakup ungkup pemaik Sarawak lalu netapka Sarawak sigi ungkup peranak nengeri tu.
“Pengawa ngambi pulai hak Sarawak patut diterenak ba tetiap runding rayat nengeri tu enggau enda ngira bansa, agama enggau idelogi politik,” ku Ali.