Bisi empat RUU deka dibantai ba Aum DUN Penggal Ketiga
KUCHING: Aum Keterubah Dewan Undangan Nengeri ( DUN) ungkup Penggal Ketiga berengkah sehari tu nyentuk ngagai 18 Julai.
Dua rang undang-undang (RUU) bekal (tambah) enggau dua ubah undang undang iya nya ubah ba Kod Tanah Sarawak 2018 enggau ubah ba Undang- Undang Ngali Minyak 2018 deka dibantai rambau aum.
Speaker DUN Datuk Amar Mohd Asfia Awang Nassar ba aum pengarang berita kemari madah Rang Undang-Undang Bekal Tambah (2017) 2018 deka dibantai Menteri Pekara Wang II Dato Sri Wong Soon Koh.
Bacha keterubah ku iya deka diadu kena 10 Julai, kedua 12 Julai lalu bacha ketiga kena 12 Julai.
Kelimpah ari nya, Wong mega deka mantaika Rang Undang-Undang Bekal Tambah (2018) 2018 ke alai bacha keterubah diadu kena 10 Julai, kedua 12 Julai enggau bacha ketiga 12 Julai.
Ubah ba Undang-Undang Ngali Minyak 2018 ku Asfia deka dibantai Sapit Kepala Menteri ke mega Menteri Industri enggau Pemansang Pengawa Dagang Datuk Amar Awang Tengah Ali Hassan.
“Bacha keterubah ba ubah tu deka diadu kena 10 Julai, kedua 10 Julai lalu bacha ketiga mega kena 10 Julai,”ku Asfia.
Sentang ubah Kod Tanah Sarawak 2018, Asfia madah ubah nya deka dibantai Sapit Kepala Menteri ke mega Menteri Betanam Betupi Moden, Tanah Adat enggau Pemansang kandang Menua Datuk Amar Douglas Uggah.
Ubah ba rang undang-undang nya deka dibacha Uggah kena 10 Julai (keterubah), kedua 11 Julai enggau bacha ketiga kena 11 Julai.
Kelimpah ari nya ku Asfia, DUN mega nerima 4 mosyen iya nya dua ari Kaban Kunsil Nengeri( ADUN) Dap Palawan, David Wong enggau dua agi ari ADUN DAP Pujut Dr Ting Tiong Choon.
Nitihka penerang Asfia aum DUN serak tu nerima 380 iti tanya ari 50 iku pengari rayat.
“Ari penyampau nya, 299 saut ‘oral’, 80 iti saut betulis enggau seiti tanya dikinsil.
“Opis Kepala Menteri nerima 68 iti tanya lalu Opis Menteri Indutri enggau e-Dagang nadai nerima sebarang tanya,’ku Asfia di Indu Opis Parti Pesaka Bumiputera Bersatu(PBB), Jalai Bako.
Dulu agi ari nya Asfia ngulu aum pra DUN betuaika Kepala Menteri Datuk Patinggi Abang Johari Tun Openg.