Enda ibuh ensiban pasal penyampau pengari ari Sarawak dalam kabinet

KUCHING: Chairman Pakatan Harapan (PH) Sarawak, Chong Chieng Jen madah rayat nengeri tu patut enda ensiban ketegal penyampau menteri enggau sapit menteri ari Sarawak ke dipilih ba kabinet enda mayuh.

Ku iya, penyampau nya ukai pekara ke berat tang ke pemadu berat iya nya pemanah pengawa enggau polisi PH tau mai pemaik ngagai rayat di nengeri tu.

“Sebedau tu, iya nya maya dikuasa perintah Barisan Nasional (BN) kitai bisi enam menteri enggau sekeda sapit menteri.

“Tajapia, rayat ditu enda ngasaika pemaik ari pemayuh menteri enggau sapit menteri ari Sarawak ke ba dalam kabinet maya nya.

“Berindik enggau nya, kitai meseti meratka pemanah pengawa enggau polisi PH lalu ukai kiruhka penyampau menteri sereta sapit menteri ari Sarawak,’ku Chong.

Iya mansutka jaku nya ba aum pengarang berita di Indu Opis DAP ditu, kemari.

Iya ke dichiri nyadi Sapit Menteri Dagang Dalam Menua, Koperasi enggau Pekara Bebeli Barang madah tuju PH ba politik ukai ungkup pemaik diri tang ketegal ti deka mai pemaik ngagai rayat.

Ketegal nya ku iya mega Kaban Parlimen( MP) Stampin enggau Kaban Kunsil Nengeri( ADUN) Kota Sentosa, Sarawak enda rugi tajapan penyampau menteri enggau sapit menteri ari nengeri tu enda mayuh.

“Aku ulih ngerintai sekeda pemaik ke udah diasai rayat nengeri tu pengudah perintah bekalih.

“Kesatu rega minyak diatu iya nya ungkup RON97 ba ikas RM2.55 seliter enggau RON95 mengkang RM2.20 seliter.

“Enti perintah enda ditukar, rega petrol ungkup RON95 diatu manggai RM2.30 seliter,’ku iya.

Pemaik kedua ke diasai rayat ku Chong iya nya ba sentang chukai Barang enggau Servis(GST) ke udah diinsur ngagai ikas kusung.

“Bisi sebana madah rega ai irup enggau pemakai di kedai kupi enda nurun tang enti nuan nuju pasar besai, rega barang udah kurang.

“Pemaik ketiga iya nya ba sentang chara Lembaga Hasil Dalam Negeri (LHDN) ngumpul chukai ke alai kami nerima mayuh komen ari pemayar chukai ti madah LHDN enda kelalu ngansak ba pekara nya,’ku iya.

Semua pemaik nya ku Chong udah diasai rayat dalam timpuh dua bulan PH merintah lalu mayuh agi pemaik bukai deka diasai rayat udah tu ila.

Bela datai MP Kuching Kelvin Yii enggau ADUN Pending Violet Yong.