GPS ditumbuh ngambi ulih dikena ngemansang komuniti
SONG: Parti Pesaka Bumiputera (PBB) nadai berasai malu ninggalka gempung Barisan Nasional (BN) begulai enggau Parti Rakyat Sarawak ( PRS), Parti Demokratik Progresif (PDP) enggau Parti Sa’ati Rayat Sarawak (SUPP) ngambi numbuhka Gabungan Parti Sarawak (GPS).
Sekretari Besai PBB Datuk Alexander Nanta Linggi mansutka jaku tu nyakal tuduh ti mejah pasal GPS di media rama.
“Kami ke bisi dalam politik ukai keran ke kuasa tauka deka ngaul diri empu dalam politik ti bebalut. Kami nyereta politik dikena ngemansangka komuniti kitai, rayat kitai enggau nengeri kitai.
“Kami nyukung sapa bagi perintah kemaya hari tang kitai deka nyakal sebarang isu ti dipejurai di renggat perintah besai ti enda deka ngemai pemaik ngagai Sarawak.
“Kitai deka nyukung sida enti sida bejakuka pekara pemansang, pengerembai, pengelikun enggau sebarang pekara manah ke bukai,” ku iya sebedau iya bejadika program ‘Student Volunteers Foundation (YSS) – Asean Mission to Sarawak’ di Rumah Aut Ujom di Temalat ditu, Hari Enam tu tadi.
Nanta ke mega Kaban Parlimen (MP) Kapit nambah, bala MP GPS iya nya bakih penyakal ngagai perintah Pakatan Harapan (PH) lalu sida enda deka nyakal chara bala MP PH gawa maya sida nyadi penyakal.
Dulu agi ari nya, iya nerangka PBB, PRS, SUPP enggau PDP ningkilka diri ari BN nengah chara ti patut.
Ku iya, iya udah ngelempaika pengandal ngagai Kepala Menteri Datuk Patinggi Abang Johari Tun Openg berandau enggau Chairman BN Datuk Seri Ahmad Zahid Hamidi ngambi madahka iya pasal pekara nya.
“Kami misah ari BN laban gaya rampa politik udah berubah lalu kami enda ngaga pemutus pia aja.
“Diau dalam BN pengudah iya alah lebuh pengawa bepilih besai nyangka ukai chara dikena Sarawak mansang ke mua,” ku iya seraya nambah, Menteri Besai Tun Mahathir Mohamad udah meri jamin sentang pekara nya.
Iya mega nerangka ngagai bala pengundi iya ke alai PBB, PRS, SUPP enggau PDP meruan bisi taja sida badu agi dalam BN.
Ngelansa pasal ‘ YSS – Asean Mission to Sarawak’ ti ngaul sepenyampau 40 pelajar universiti ari menua Asia begempuru di Kampung Gelam enggau Rumah Aut Ujom berengkah ari 7 ngagai 17 Julai.
Bala pelajar deka dianjung ngagai sekula ti dipilih besemak enggau Kampung Gelam enggau Rumah Aut ngambika nyaup bala pengajar ba pengawa ngajar enggau belajar.
Bala sida deka nyediaka ripot ti deka dibantai maya sida mulaika diri ngagai Putrajaya ba pengujung program nya.
Sama bisi datai Chairman YSS, Datuk Zuraidah Atan enggau Direktor Opis Foreign Affairs Ministry’s Sarawak Regional Deddy Faisal Ahmad Salleh.