Urung 322 nembiak ari pelilih Sarikei ngulu licha peransang UPSR 2018
SARIKEI: Urung 322 iku nembiak sekula, apai indai enggau bala pengajar sekula primari ari pelilih Sarikei bisi ngulu Licha Peransang Pelajar Ujian Penilaian Sekolah Rendah (UPSR) 2018, kilah ensana.
Program tu nyadi sebagi ari Program Pemansang Komuniti Kaunsil Pelilih Sarikei enggau kerejasama Opis Pelajar Pelilih Sarikei ari Unit Bimbingan dan Kaunseling Sekolah Kebangsaan (SK) St. Anne enggau SK Udin Sarikei.
Ari penyampau nya, 230 iku pesereta iya nya bala nembiak, 50 iku apai indai enggau 42 iku pengajar ngiring.
Program tu dikena ngenegapka komuniti di menua nya kelebih agi bala nembiak sekula ti deka napi peresa UPSR.
Berebak enggau nya, program tu mega dikena meri kelala ngagai bala pesereta pasal pangku pengawa enggau tanggungpengawa sida nyadi nembiak sekula enggau anak.
Kelimpah ari nya, program tu mega meri kelala ngagai apai indai pasal pangku pengawa sida nempa bala anak nyapai penyulut ba pelajar.
Program tu mega nyadi pelasar ngagai bala nembiak dikena meri peransang ngagai sida sebedau napi peresa UPSR.
Program tu udah diatur di Balai Sentral Sarikei lalu udah diembing pengelicha ti dikangau, pengajar Ahmad Faizal Osman tauka tebilang agi dikangau Cikgu Emmet.
Temuai dipebasa ti bisi datai bejadika program nya Chairman Kaunsil Pelilih Sarikei, Kaunsilor Wong Zee Yeng, lalu sama bisi datai Penulung Pemesai Opis Pelajar Pelilih (PPD) Sarikei, Faustino Fredrik Emparan.