Dua bebadi nyawa ba penusah bebadi di Jalai Betong Sarikei

SARATOK: Sebuah bas belantak enggau sebuah kerita di Kilometer 57 Jalai Betong Sarikei, ditu, malam ensana, ngujungka orang ti deriba enggau siku agi ti nepan kerita bebadi nyawa ba endur penusah nyadi ketegal balat bakar.

Penusah tu nyadi urung pukul 10.30 malam, ba endur besemak pendam Bukit Perabun Saratok.

Ketuai Polis Pelilih Saratok, DSP Mordani Tanin madahka seduai ti bebadi nyawa, siku lelaki, Luk Chung Hee, 48, enggau siku indu ke duduk ba penuduk mua kerita, Serafina Forrin Sabbas, 26.

“Pansik tumu penusah nya tetemuka penusah tu bepun ari deriba kerita enda tetagangka kerita lalu tempawah ngagai jalai sepiak ngujungka belantak enggau bas ti datai ari mua lalu mai orang tambang ari menua sepiak, Indonesia.

“Lansa bukai, 14 iku orang tambang dalam bas nya enggau dua iku deriba diripot nadai apa nama lalu nadai napi sebarang bakal,” ku iya ba penerang berita, kemari.

Dipelaba lebuh penusah nyadi, seduai ti bebadi nyawa benung ba rantau jalai ari Sarikei nuju ke Betong, seraya bas nya datai ari mua.

Nitih ku Mordani, bangkai seduai bela dibai ngagai Sepital Saratok ungkup atur pengawa ti patut, seraya penerang silik bekaul enggau penusah nyadi bela diambi ari deriba enggau orang tambang bas.

“Diatu kes nya dipansik di baruh Seksyen 41(1) Akta Pengangkutan Jalan (APJ) 1987,” ku Mordani nandu.

Ba lansa bukai, Ketuai opis Bomba enggau Penyah Penusah Saratok, Nazary Mohamad madah laban seduai ti bebadi nyawa bela tepekul dalam kerita, raban bomba mega minta bantu ngeluarka tubuh seduai.

“Raban bomba begunaka lebih kurang 30 minit ngeluarka tubuh seduai ngena ‘hydraulis cutter’.

“Taja pia, seduai udah dituku parai ari raban perubat ari Sepital Saratok ti sama bisi ngesah ngagai endur penusah nyadi,” ku iya.