Pengerami ‘Ramah Tamah’ Aldilfitri nyadi palan nyintal pengerapit kaul
SRI AMAN: Pengerami Ramah Tamah Aidilfitri ti diatur di selampur nengeri diperati nyadi panggau besai ngerapitka agi sintal kaul penyerakup antara pupu bansa, pia ku Kaban Kunsil Nengeri (ADUN) Lingga, Simoi Peri.
Kenu ku iya, nengah atur pengerami ke baka nya, kaul penyerakup antara raban bansa ti ngintu pengerami nya ulih diteguhka agi enggau nempa ulah ngusung pangan diri.
“Kitai di Malaysia kelebih agi di Sarawak endang berasai lantang enggau penyerakup ke bisi ngelama tu lalu ulih dipeda tetiap kali hari besai datai, semua bansa begelemu sereta bela berami ngatur pengerami ngelalu pengabang sereta mega makai selamat,” ku iya.
Iya mansutka jaku nya lebuh bejaku ba Pengerami Ramah Mesra Aidilfitri 2018 diatur Serakup Pedagang Mit Sri Aman bepalan di Balai Mayuh Guna Kampung Hilir semak ditu, malam kemari.
Ku iya, pengawa ngatur pengerami baka tu mega meri awak ngagai bansa bukai ngelala budaya enggau adat asal bansa ti ngintu pengerami ari ngemeranka ulah ngusung pangan diri.
“Menua kitai ke amat chukup nyelai laban semua bansa bisi awak ngintu pengerami hari besai, ambika chunto, Hari Raya ti diintu raban bansa Melayu mega meri awak ngagai raban bansa Iban, China, India enggau ke bukai berami begulai.
“Pia mega maya Gawai Dayak, Taun Baru China enggau hari besai buklai bela meri awak ngagai bansa Melayu berami begulai lalu tu nyadi penyelai hari besai kitai di menua tu,” ku iya nerang.
Sama bisi datai, Ketuai Raban Indu Parti Pesaka Bumiputera Bersatu (PBB) Pampang Lingga, Dayang Mageret Abang Hamid, chairman serakup Salbiah Bujang sereta bala ketuai raban bansa ke bukai.
Berebak enggau nya, pengerami mega dirichah enggau pengawa mantaika lagu raya enggau chabut tikit benasit.