Perintah Nengeri meri wang turu dikena ngemanahka Bandaraya Miri
MIRI: Perintah Nengeri meri wang turu menua tu dikena ngaga Opis Kunsil Dewan Bandar Raya Miri (DBRM) ngenegapka Miri nyadi sebuah bandaraya, lalu ngemanahka agi pengawa sida iya ngagai rayat.
Berita manah nya dipadah ulih Kepala Menteri Datuk Patinggi Abang Johari Tun Openg ba atur pengawa makai lemai nyambut Hari Bandar Raya Miri ke- 13, malam kemari.
Abang Jo ngarapka semua projek ngaga kelai baru nya ulih dikeamatka dalam kandang 2 taun tu ila.
“Kena ngeramika 13 taun nyadi bandar raya, aku ngarapka udah tu ila, lebuh kita nyambut Hari Bandar Raya Miri ke-15, kita deka ngembuan sebuah dewan bandaraya baru.
“Malam tu, Perintah deka meri wang turu ngagai kita kena ngaga dewan bandar raya Miri. Tu pemeri aku ngagai Miri,” ku iya.
Abang Jo madah, dewan deka ngari sereta mandangka Miri nyadi sebuah bandar raya enggau ngaga pengawa DBRM tu ke pemadu iya manah.
Kelimpah ari nya, Perintah Menua deka meri wang turu kena kita ngaga kelai tanda nama MIRI ba atas Bukit Kanada.
Tanda nama nya deka diengkah beratika serata bandar raya Miri ari atas bukit nya.
“Kita tentu deka begunaka wang turu kena ngaga infrastruktur nya. Perintah Menua mega deka mantu kelebih agi ke pengawa dagang temuai.
Abang Jo mega meri puji ngagai pemesai pengawa ti udah digaga ex- Kepala Menteri Tun Pehin Sri Abdul Taib Mahmud enggau Sapit Kepala Menteri Datuk Patinggi Tan Sri Dr George Chan Hong Nam laban udah mujur ngubah Miri ari sebuah pasar ke mit ngagai sebuah bandar raya endur belelak.
Pemansang Miri Central Park di Marina Bay entara pemansang ke patut ngasuh mensia mayuh ke diau di Miri berasai temegah ati.
Penemu sereta runding ke kreatif ngubah nanga sungai Miri nyadi palan marina sereta komersil, ngubah palan nya nyadi palan ke moden.
“Sitak tu manah endar maya malam hari, lalu kilah ke siang, penuh enggau chura gadung. Enti dibandingka enggau Marina di Singapore, pelaba aku, Marina ditu manah agi laban bisi gdung,” ku iya.
Iya nandu baru madahka, pemansang Miri diperambu enggau manah, ngambika ulih ngaga bandaraya nya ngembuan pemaik rampa menua sereta manah endur temuai.
Miri ngembuan sitak tampa menua ke manah endar ke ulih dipeda dalam bandaraya Miri empu, ke nyukung pengawa ngibun sereta nyaga rampa menua dia.
Penuduk Miri ba tengah entara tebing pantai enggau gaya lanskap tanah tinggi matak mayuh temuai rindu ngelawa palan rampa menua asli, ke ulih ngelawa Gua Niah, Gua Mulu, sitak tanah tinggi enggau kampung dalam pelilih menua Miri.
Berindik enggau nya, Abang Jo minta sida ke ngaga pakej dagang temuai Miri ke temuai luar ulih ngemanahka agi Bandaraya Miri nengah digital sereta mayar ngena sistem bayar Sarawak Pay.
“Enti kitai deka ngaga Bandaraya Miri ti nyadi endur ke ulih alai diau sereta belelak, kitai patut betatika pemeresi sereta kreatif ngangkatka Miri nengah digital.
“Pemisi IT, aku nemu Miri deka nyadi sitak menua ke deka matak mayuh temuai ngagai Miri,”ku iya.
Sama bisi enggau ngulu atur pengawa nya, bini Kepala Menteri Datin Patinggi Datuk Jumaani Tunku Bujang, Menteri Opis Kandang Menua enggau Pengawa Berumah, Datuk Professor Dr Sim Kui Hian enggau Menteri Dagang Temuai Sarawak, Datuk Abdul Karim Hamzah.