Rayat Sarawak dilalau terus beserakup nengah politik baru
LIMBANG: Mensia mayuh di menua tu dilalau majakka pengawa sida iya ngenegapka pengawa berakup dalam gaya pemaik taja pan ba dalam gaya politik ke baru.
Menteri Muda Pengawa Betanam Betupi Dr Abdul Rahman Ismail madahka pengawa berakup sereta kerejasama sigi berat kena beratika agenda pemansang dipejalaika enggau lanchar.
Iya madah Perintah Menua tetap betatika pemun pemansang, modal mensia enggau ekonomi, ngemansangka menua tu.
“Rayat begunaka pemerat berakup ngambika projek pemansang ulih dipejalaika enggau lanchar, alai Sarawak agi beguna endar ke pengawa pemansang” ku iya madah lebuh bejaku ba atur pengawa pengerami Hari Raya Aidilfitri di Palan Pemansang Komuniti Melayu Limbang ditu, kemari.
Sama bisi enggau ngulu atur pengawa nya, Kaban Parlimen ( MP) Limbang, Hasbi Habibollah, pengari ari Opis Pelilih Menua Limbang, Hamidah Halpi, Chairman Gerempung Melayu Limbang (PML) Mohamad Abu Bakar sereta sekeda pemesai bukai.
Dr Abdul Rahman ti mega nyadi Kaban Kunsil Nengeri (ADUN) Bukit Kota nandu baru madahka pekara bekait enggau pemun infrastruktur baka bekal ai beresi sereta elektrik 24 jam, pemerat ke kedeka mensia mayuh ke diau di sitak nya, deka dikemansangka di menua tu.
“Enti nitih, Kepala Menteri Datuk Patinggi Abang Johari Tun Abang Openg deka majakka pengawa Perintah betatika pemerat pemansang menua pesisir ngambika ulih ngurangka tikas pemansang entara nengeri enggau menua pesisir,” ku iya.
Ba pekara bekait enggau pengawa betanam betupi, Dr Abdul Rahman madah Sarawak ngembuan dua juta hektar tanah ke manah endur ngemansangka pengawa betanam betupi, lalu kena ngamatka pemerat nya, Perintah menua deka negutka kaul sida iya enggau Perintah Besai, laban Sarawak kurang pakar sereta wang.
Bekait enggau gerempung nya, Dr Abdul Rahman madah iya minta PML, ke nyadi sebuah gerempung ke pengabis tuai beratika kuing sida iya ngambika agi majak relevan dalam pengawa pemansang dalam komuniti.
Sebedau nya, ba jaku Mohamad madahka pengerami kena nyendiaka sebuah palan ngenegapka kerejasama entara orang Islam sereta komuniti ari pupu bansa bukai.