Enti pengawa tu mujur digaga iya ulih mantu ngurangka penyampau orang seranta ba menua pesisir ke agi ba tikas 1.6 peratus
MIRI: Dewan Dagang enggau Industri Dayak (DCCI) diasuh ngena kuasa sida iya mungkal pengawa ti bisi disediaka kena nyukung pengawa Perintah ngenyadika Sarawak nyadi pengeksport besai produk bepelasarka pengawa betanam betupi manggai taun 2030 tu ila.
Sapit Kepala Menteri Datuk Amar Douglas Uggah Embas madah, pekara tu ngipak pemerat menua baka kediatu, iya nya ngemoden, komersil sereta ngena digital ba pengawa betanam betupi.
Iya madah entara pungkal pengawa ke udah berengkah digaga ulih Perintah Menua, iya nya ngena Internet ke Semua Pengawa (Internet of Things tauka IOT) di Taman Kekal Pengeluaran Makanan (TKPM) di Rampangi.
Ku iya, Perintah Menua Sarawak ngungkupka RM68 juta kena ngemanahka agi bemacham sukut sereta sistem di TKPM, semak Kuching ditu, ke ngena konsep pengawa betanam betupi moden sereta digital.
Uggah nandu baru madahka pengawa ke manah iya nya, lima ari 15 penyereta ke enggau ngaga program tu semua injinia ke agi biak, tang diatu sida iya udah mujur nyadi orang dagang pengawa be- tanam betupi.
“Perintah deka ngerembaika pengawa betanam betupi pintar mungkur semua projek betanam betupi di menua tu. Chara tu ngipak pengawa Perintah deka ngemodenka pengawa betanam betupi.”
“Nya alai, aku deka meda raban DCCI ngerebut peluang tu ngenyadika Sarawak nyadi menua ke ngereja pengawa betanam betupi moden,” ku iya madah ba atur pengawa makai lemai Gawai Kaamatan 2018 ti diatur begulai, DCCI enggau Dewan Dagang enggau Industri Kadazandusun (KCCI) di Eastwood Valley Golf & Country Club malam kemari.
Uggah ti mega nyadi Menteri Ngemodenka Pengawa Betanam Betupi, Tanah Adat enggau Pemansang Menua Pesisir madah, pengawa betanam betupi moden tau nyadi pengawa ke besai ngagai komuniti di menua pesisir ke bulih pemisi sida iya bepanggai ba asil betanam betupi.
Iya mega madahka enti pengawa tu mujur digaga ulih mensia mayuh di menua pesisir, iya ulih mantu ngurangka penyampau meskin menua pesisir ke agi ba tikas 1.6 peratus.
Dalam konteks tu, Uggah mai DCCI ngaga randau enggau Perintah Menua, ngiga jalai tauka chara bakani ku sida iya ulih bejalaika pemerat pengawa nyukung program tranformesyen.
“Opis Menteri kami meransang sereta ngelaluka raban nembiak ngereja pengawa betanam betupi ke ulih nyadi pengawa sida iya. Mayuh peluang latih, iring, embing sereta bantu wang bisi disediaka ke rebak baru tu,” ku iya.
Sebedau nya, Presiden DCCI Datuk Joseph Salang Gandum ba jaku iya madahka pengawa ngemodenkan pengawa betanam betupi nengah ekonomi digital enda ulih digaga kediri ulih opis menteri nya tang begunaka sukung pemain industri nyengkaum DCCI enggau KCCI.
“Kitai enda ulih minta sida ke bumai ngeluarka mayuh agi produk enti Perintah enda ulih nyendiaka makit ke sida iya. Nya alai, enda tau enda bisi kerejasama enggau opis menteri ngemodenka pengawa betanam betupi ngaitka sida iya tu enggau makit.”
“Ambika chunto baka taun siti nyin tadi, Sarawak mujur nganjung eksport durian ke menua China. Enti nitih, mayuh endar peluang ke ulih dikerembaika nyengkaum pasar nanas enggau pisang, laban beratika utai ke ditanam tu galak endar di Sarawak tang nadai makit,” ku iya.
Salang nandu baru madahka, taja pia, pemisi bantu ari opis menteri, sida ke bumai ulih ngiga makit ke produs sida iya.
“Berindik ari nya, komiti DCCI deka ngampir menteri cabinet baru Sarawak nyengkaum dua pengari ari Sarawak ngulihka bantu tu.”
“Kitai ngarapka sida iya meret pemerat komuniti Dayak, lalu ketegal nya, DCCI enggau KCCI dalam jurai kami, deka betemu enggau sida iya lalu ngiga chara nambah penyereta Kazadandusun enggau Dayak dalam industri baru opis menteri tu,” ku iya.
Sama bisi enggau ngulu atur pengawa nya, Sapit Kepala Menteri ti mega nyadi MenteriPemansang Infrastruktur, Tan Sri Datuk Amar Dr. James Jemut Masing; Sapit Kepala Menteri ti mega nyadi Menteri Pengawa Dagang enggau Industri, Datuk Seri Panglima Wilfred Madius Tangau; Presiden KCCI Datuk Bonipasius Bianis enggau chairman pengatur pengawa makai lemai ti mega nyadi sapit presiden DCCI, Kilat Beriak.
Ba atur pengawa nya, Uggah besemaya dgn meri ungkup RM50,000 ngagai atur pengawa nya.
Urung 400 temuai bela bisi enggau ngulu atur pengawa nya nyengkaum 150 iku baka KCCI ari Kota Kinabalu ngeramika atur pengawa nya.
Opis Menteri kami meransang sereta ngelaluka raban nembiak ngereja pengawa betanam betupi ke ulih nyadi pengawa sida iya. Mayuh peluang latih, iring, embing sereta bantu wang bisi disediaka ke rebak baru tu. Datuk Amar Douglas Uggah Sapit Kepala Menteri