SUPP Dudong mantaika lima resolusyen nengah EGM

SIBU: Aum Ngenyit (EGM) Parti Sa’ati Rayat Sarawak (SUPP) Dudong udah mantaika lima bengkah resolusyen di Indu Opis Parti ditu, kemari.

Resolusyen keterubah, nitihka undi raban pati parti nya, 136 undi (84%) ngundi ninggalka Barisan Nasional (BN), 26 undi (16%) ngundi mengkang begulai enggau BN lalu tiga iti undi ari 165 undi dirikod jai.

Ba pemutus resolusyen kedua, SUPP Dudong, 87 undi (52%) besetuju SUPP begulai enggau Gabungan Parti Sarawak (GPS), 75 undi (48%) deka meda SUPP nyadi parti ngatika diri enggau tiga iti undi rusak ari semua 165 undi.

Pemutus resolusyen ketiga sida minta SUPP semina begulai enggau GPS tang SUPP, PBB, PRS enggau PDP meseti nyadi parti komponen sereta bela tikas dalam GPS.

Chairman SUPP Dudong Wong Ching Yong madah, GPS meseti bejalaika siti sistem undi siti parti alai tiap bengkah undi nya bela, nadai datai ari parti politik ke bukai enti enda disetuju semua sebedau pemutus ulih digaga.

“Batang isu enggau pekara ti bekaul enggau polisi perintah, chara nyengkaum penuduk besai ba ejensi perintah enggau pekara bekaul enggau hak Sarwak enggau empat parti komponen meseti disetuju semua sebedau ngaga pemutus.

“Nadai parti komponen dalam GPS deka bediri lebih ari setengah penuduk ba pengawa bepilih nengeri tauka bepilih besai, GPS meseti nerima chalun ti disetuju parti komponen, pemutus sapa chalun ari pemutus komponen parti, chara megai pengeraja asal, pekara tanah enggau pengawa meri projek perintah meseti digaga enggau luru baka tender dibuka ngagai semua, ngambi pengereja pengawa perintah meseti nitihka pupu raban bansa Sarawak sereta meseti bepelasarla meritokrasi,” pia ku iya madah.

Nambahka nya, iya nerang, ba resolusyen keempat SUPP Dudong, sida bepenemu kena 30 September 2018, semua pengereja pengawa perintah serata Sarawak ba opis kaunsil, ejensi perintah enggau penuduk ketuai raban bansake agi dipegai raban Parti Rakyat Bersatu (UPP) meseti disilih enggau sida ke dianjung nama SUPP.

“Resolusyen kelima, SUPP Dudong minta atur dalam SUPP diubah baru dikena numbuhka dua iti penuduk Sekretari Besai (SG) iya nya siti penuduk diberi ngagai bansa China lalu siti ari diberi ngagai bansa Dayak,” ku iya nyemetak.

Sama bela datai maya aum tu iya nya Sapit Chairman SUPP Dudong, Kelvin Kong, Sekretari Kong Sing Ping enggau Chairman Unit Bumiputera Kaunsilor Ladong Engkol.