Genturung pendiau Kem Piasau patut bisi orang nyaga nentuka pengelikun
MIRI: Pekara bekait enggau pengelikun ngelingi genturung pendiau Kem Piasau patut dikemeratka laban muntang kena penusah diserungkai sereta angus.
Kaban Parlimen ( MP) Miri, Dr Michael Teo minta pengawa nyaga pengelikun patut digaga enggau suah agi, ngambika ulih nyeliah sebarang badi nyadi ke tau ngerusak reta tengkira, badi sereta orang parai.
“Diatu nadai orang ke nyaga endur tu malam hari. Aku bisi dipadah, bisi kes rumah angus sereta pengawa nyerungkai rumah ti digaga ulih orang ke enda betanggungjawab suah endar nyadi ditu,” ku iya madah lebuh dikerandau ulih pengarang berita ba atur pengawa Rumah Tebuka ti digaga gerempung sida ke udah bepinchin ke kala gawa di Opis Perintah (PPKS) Miri di Kem Piasau ditu.
Bedau lama tu tadi, sebuah rumah kusung semak enggau rumah PPKS angus kena empa api lalu ngirauka ati kaban ke minta pengawa meresa pengelikun enda tau enda digaga kelebih agi kilah ke malam.
Kelimpah ari nya ku iya, pengawa salah nyerungkai rumah suah diripot kelebih agi rumah ke nadai dijaga sereta enda bepagar.
“Kami minta endur ditu dijaga enggau manah, ngambika ulih dikena NGO. Kelimpah ari gerempung orang ke bepinchin, gerempung bukai mega minta pengelikun di endur tu dijaga,” ku iya.
Entara gerempung bukai ke bisi opis di Kem Piasau, iya nya Gerempung Orang ke Timpang Pendiau Miri, PEMADAM, Gerempung Ex-Polis Malaysia (PBPM) Miri enggau palan Pengerai dalam Komuniti (PDK).
Teo mega madahka, pekara bekait enggau pengelikun Kem Piasau deka dibantaika ngagai orang tauka opis ke betanggungjawab ba pekara nya, sereta dipinta ngemutarka pekara nya enggau lengkas.
Ba atur pengawa nya kemari, ketiga taun iya udah digaga ti diatur ulih pengudah rumah nya digaga manah agi tiga taun tu ke udah.
Atur pengawa nya kemari meri peluang ngagai komuniti, ngambika sida iya deka nemu enggau silik agi pasal pengawa ke digaga ulih gerempung nya lalu meransang ex-orang ke udah bepinchin ari opis perintah nyadi kaban gerenmpyung,
Sama bisi enggau ngulu atur pengawa nya, Patron PPKS Miri, Datuk Ahmad Lai Bujang enggau chairman Miri Dennin Fredericks.