Rayat Sarawak chukup ngarap Perintah Besai pegai Pakatan Harapan ulih neruska program pemansang di nengeri tu
KUCHING: Tuai Pemegai Menua (TYT) Tun Pehin Sri Abdul Taib Mahmud ngarap semua manifesto Perintah Pakatan Harapan (PH) maya pengawa bepilih tu tadi ulih dikemujur enggau manah lalu mai pemaik ngagai rayat.
Taib pechaya rayat Sarawak chukup ngarap Perintah Besai ke baru ulih neruska program pemansang di nengeri tu.
“Nengeri Sarawak mengkang begunaka projek infrastruktur kelebih agi di menua pesisir.
“Sarawak chukup besai ke alai genturung pendiau bisi ba mayuh ba bengkah menua. Jalai alun meseti diangkatmanah lalu pia mega bekal ai enggau lektrik.
“Atur nyendia servis pelajar enggau pengerai bekualiti ngagai rayat meseti ditegap. Pengelikun mega meseti ditegap ngambika rayat di nengeri tu idup enggau lantang,”ku Taib.
Iya mansutka jaku nya ba jaku bejadi Aum Dewan Undangan Negeri(DUN) Ke 18 Penggal 3 di Komplek DUN ditu, kemari.
Taib nambah, projek ari Perintah Besai ke meri empas besai ngagai Sarawak meseti ditampung kelebih agi projek di menua pesisir.
“Projek infrastruktur baka ke Projek Jalai Besai Pan Borneo meseti tembu nitihka perambu.
“Projek tu chukup berat ba pemansang sosio ekonomi Sarawak,”ku iya.
Kelimpah ari nya, iya ngarap pemansang di SCORE bela ditegapka agi ketegal palan nya ulih nyaup ngangkatka ekonomi Sarawak ngagai ikas ke tinggi.
Sukung ari Perintah Besai mega ku Taib ditagih ngambika program pemansang ekonomi digital Sarawak ulih dikemujur.
Pemujur ba ekonomi digital deka ngerapit bida digital Sarawak enggau kandang endur ke udah mansang di Malaysia, tandu Taib.
Taib ngenataika pengaga ati pengudah Perintah Nengeri ngaga kerejasama rat enggau Perintah Besai lalu pechaya pekara nya deka ngemujur program pemansang Sarawak.
“Kerejasama ke diberi Perintah Nengeri ngagai Perintah Besai nyata mandangka ketuai politik Sarawak ngembuan tenung ke jauh.
“Pemansang nengeri enggau pengelantang rayat dulu agi ari pemaik politik,”ku Taib.
Ngenang kaul bukai, iya pechaya pemutus numbuhka Gabungan Parti Sarawak(GPS) ku Taib seraris enggau aspirasyen rayat Sarawak.
GPS ku iya deka nyendia platfom ke tegap ngagai Perintah Nengeri ba pengawa negika hak enggau atonomi Nengeri Sarawak nitihka Sempekat Malaysia 1963(MA63).
“Aku pechaya GPS deka nyadi seiti gempung perti politik ke tegap lalu ulih mai rayat berakup ungkup pemaik enggau pengelantang Sarawak,”Ku Taib.
Aum digulu Speaker DUN Datuk Amar Mohamad Asfia Awang Nassar, Kepala Menteri Datuk Patinggi Abang Johari Tun Openg.
Bela datai ketetiga sapit Kepala Menteri Datuk Amar Douglas Uggah, Tan Sri James Masing enggau Datuk Amar Awang Tengah Ali Hassan.
Nengeri Sarawak mengkang begunaka projek infrastruktur kelebih agi di menua pesisir. Tun Pehin Sri Abdul Taib Mahmud TYT Nengeri Sarawak