TYT arapka hak adan maritim diintu manah

KUCHING: Tuai Pemegai Menua( TYT) Sarawak Tun Pehin Sri Abdul Taib Mahmud arapka hak ba pekara garis adan Sarawak kelebih agi adan maritim diintu enggau manah.

Ku iya, pekara nya berat ngambika pengeraja asal ke berega baka ke minyak enggau gis di kandang tasik ulih dikereja lalu dikemansang ungkup pemaik enggau pengelantang Sarawak.

“Aku pechaya atur neritka Ordinan Ngali 1958 enggau Gis Distribution Ordinance 2016 deka nentuka minyak enggau gis ulih diintu enggau manah.

“Pemansang ba pengawa minyak enggau gis berat ungkup pemaik Sarawak jemah ila,”ku iya.

Taib mansutka jaku nya rambau bejadi Aum Dewan Undangan Negeri (DUN) Ke 18 Penggal 3 di Komplek DUN ditu, kemari.

Ngenang kaul ke sama, iya madah atur numbuhka Petroleum Sarawak Berhad (PETROS) seraris enggau pengeran Perintah Nengeri ngemansang industri minyak enggau gis.

Ku iya, pekara nya mega seraris enggau aspirasyen Sarawak ti deka nyadi hab minyak enggau gis ke tebilang.

“Petros deka ngadu kerejasama enggau Petronas ungkup pemaik Malaysia kelebih agi Sarawak,”ku iya.

Dulu agi ari nya, Taib meri jaku puji ngagai Pakatan Harapan (PH) ti udah numbuhka perintah baru asil pemujur ba Pengawa Bepilih Besai ke-14 kena 9 Mei 2018.

Jaku puji mega diberi Taib ngagai Tun Dr Mahathir Mohamad ketegal sekali agi dichiri nyadi Menteri Besai.