Projek Jalai Besai Pan Borneo dulu dua peratus
KUCHING: Menteri Kereja Raya Baru Bian madah pejalai Projek Jalai Besai Pan Borneo diatu dua peratus dulu ari perambu asal projek.
Ku iya ba aum pengarang berita di Indu Opis JKR di Wisma Saberkas kemari, projek nya diatu udah manggai 22 peratus.
Bepelasarka statistik nya, Baru pechaya Projek Jalai Besai Pan Borneo ulih tembu digaga nitihka perambu.
“Tajapia, kitai enda nemu pekara ti deka nyadi jemah. Tang statistik mandangka projek dulu dua peratus ari perambu asal.
“Statistik diatu ba ikas 22 peratus enti dibandingka 20 peratus ba perambu asal projek.
“Reti nya pejalai projek diatu ‘ok’,’ku Baru ke alai dulu agi ari nya iya mendingka penerang ari pemesai JKR Sarawak betuaika Direktor Datu Zuraimi Sabki.
Tajapan pejalai projek nya manah, Baru ke mega Kaban Parlimen( MP) Selangau enggau Kaban Kunsil Nengeri(ADUN) Ba’kelalan madah seiti pakej bisi lubah ari perambu asal.
Pakej Bulatan Serian nuju ngagai Simpang Pantu ku iya bisi laun 7.9 peratus ari perambu asal.
Projek Jalai Besai Pan Borneo ke bisi 11 pakej begunaka belanja RM16.5 biliun lalu disadang tembu ba taun 2021.
Nyaut tanya pemberita sentang pengawa ngemanah sekula repuk ke diberi ngagai JKR Sarawak, Baru madah semua nya deka 100 peratus tembu ba bulan Ogos 2018 tu.
JKR Sarawak ku iya udah diberi tanggungppengawa ngemanah 50 sekula repuk lalu ba bulan Julai tu semina seiti aja ke bedau tembu.
Ba 116 iti sekula ke bisi napi penanggul bedau ditembu ku Baru, tanggungpengawa nya diberi ngagai opis menteri pelajar lalu nadai bekait enggau JKR Sarawak.
Baru mega madah agi bisi 210 iti agi sekula repuk di Sarawak nganti gintir dikemanah ke alai penyampau semua sekula nya manggai 415 iti.