Teras muji pemutus UPP nyadi parti ngatika diri

KUCHING: Parti Tenaga Rakyat Sarawak ( Teras) muji pengawa digaga Parti Rakyat Bersatu ( UPP) ti nyadi parti ngatika diri di Sarawak.

Sekretari Besai Teras Banyi Beriak madah nyangka tu langgur penemu ti manah ngagai Teras enggau UPP berunding nyerenihka baru penemu ngambika tau begempung ba baruh siti gempung nyengkaum State Reform Party (Star) enggau Parti Bansa Dayak Sarawak Baru (PBDSB) sereta mega semua parti di menua tu ti enda dikangau nyemilik Gabungan Parti Sarawak (GPS).

Suba Kaban Kunsil Nengeri (ADUN) ari Teras enggau UPP kala begempung dalam Teras dalam taun 2015 pengudah sida mantaika diri kena 15 Mei 2015.

Teras kala ngerikod ngembuan 10 iti penuduk di kunsil nengeri enggau dua di parlimen.

“Kitai suba kala begulai pengudah kitai madahka diri kena 15 Mei 2015 pengudah 11 iku pengari rayat nyemilik Teras. Lebuh nya, siku ari sida, udah nya nyadi Presiden Teras, Tan Sri William Mawan Ikom – megai pangku pengawa ADUN nengeri enggau MP. Aku ngasaika diatu pilih enggau awak ti patut endur Teras enggau UPP ngelanggur baru penemu ari buah runding nya,” ku Banyi Beriak.

Ba lansa bukai, ku Banyi, raban renggat baruh Teras dekaka ex-Presiden sida, Mawan, ADUN Pakan, nyemilik parti nya baru.

Mawan diatu dalam Parti Pesaka Bumiputera Bersatu (PBB).

“Enti kami enda dikangau bala GPS nyereta gempung nya, kami patut berundingka pilih bukai nyengkaum nyangka numbuhka payung baru parti ti dikangau ‘Sarawak Baru’. Aku ngarapka UPP, Star enggau PBDSB nerima langgur penemu tu,” ku iya.

Ku Banyi, iya kelalu kiruh gawa nentuka kesemua 25 pampang parti dalam parti udah nganjung ‘asil’ ninting taun sida.

“Tu mega dikena nentuka parti politik ti ditumbuhka kitai dalam taun 2013 deka sedia ngambi bagi maya Pengawa Bepilih Sarawak ti deka diatur dalam bulan September 2021,” ku iya.

Teras nadai kala bediri ngena tambai enggau lambang sida. Teras ditumbuh bala kaban ari Parti Demokratik Progresif Sarawak (SPDP) ke dulu suba.

Ku UPP, sida deka ngaga nama enggau lambang baru lalu MoU ti udah disain enggau Parti Sa’ati Rayat Sarawak sebedau pengawa bepilih besai otomatik tekinsil pengudah perintah Sarawak mansutka diri ari gempung Barisan Nasional (BN).

Taja pia, UPP nadai mansutka penemu baka ni MoU deka mangka kededua parti enggau gempung GPS ke baru.