Peranak Sarawak udah lama nganti bekaul ubah isu tanah
BAU: Kunteriktor ke udah dichiri bejalaika projek pemansang ba sitak Kunsil Nengeri ( DUN) Serembu patut ngemujurka pengawa nya dalam timpuh ke udah diletak.
Kaban Kunsil Nengeri ( ADUN) Serembu, Miro Simuh madah tanggungpengawa ngemujurka projek pemansang perintah lebih agi ba konstituensi nya patut dikelengkas ke pemaik rayat ti chukup begunaka pemansang.
Kenu ku iya, dedini projek ke enda ngemantup ati tentu deka ngasuh mensia mayuh enda lantang ati lalu tau meri pangka enda manah ngagai perintah nengeri.
“Perintah nengeri seruran ngelempaika fokus ngagai rayat lalu genap projek endang patut tembu nitihka timpuh.
“Kelimpah ngerunding penguntung, kunteriktor patut berundingka pengidup dudi hari lalu ukai berundingka pekara ke semina meri penyenang sekejap aja laban kitai enggai meda projek semina tembu ‘tinchai’,” ku iya rambau ngabas projek ba DUN Serembu apin lama ke udah.
Berebak enggau nya, Miro madah, projek ke udah diberi ngagai kunteriktor patut dipejalai dikena nentuka rayat renggat baruh lantang ati ngagai perintah.
Kenu ku iya, nyema kunteriktor nitih atur ke udah ditimpuh tentu iya deka meri penguntung ngagai peranak DUN Serembu.
“Nyadi, kunteriktor patut ngamatka semaya lalu nembuka pengawa nitih atur ke patut.
“Kebuah pia, nyema kunteriktor ngembuan ulah ‘tinchai’, iya ukai semina ngenyai nama perintah nengeri tang mega ngenusah rayat,” ku iya. MIRI: Peranak asal nengeri tu, kelebih agi bansa Iban, nganti enggau liat ati Aum Kunsil Nengeri (DUN) ke dipungkal sehari tu, mendingka isu bekaul ubah Kanun Tanah Sarawak ti deka dibantai.
Kenyau iya dibantai taun nyin tadi, pengudah pansik silik dipejalai siti komiti ti ditumbuh khas mansik silik bekaul enggau hak tanah Adat Bansa Asal (NCR) di nengeri tu nyengkaum Pulau Galau enggau Pemakai Menua ( PMPG), mensia mayuh tentu deka nemu asil ti deka dibantai.
“Kitai sabar ati ngelama tu ngandalka iya deka mai berita manah ungkup raban bansa Dayak kelebih agi bansa Iban, bekaul enggau tanah NCR enggau PMPG ti deka dibantai lagi,” ku iya nengah Chairman Raban Pemikir Dayak ( DTTG) Pampang Miri, Elias Lipi Mat.
“Dikena nyamin hak ba tanah NCR tu, kitai ngansak Perintah Nengeri Sarawak numbuhka Tribunal Bicara Kes Tanah NCR baka ti diperambu Ketuai Akim Sabah enggau Sarawak,” ku iya.
Nitih ku Elias, perambu nya tau diperunding nyadi siti ari atur pengawa ti ulih mantu mutarka petalat enggau isu tanah ti majak nyadi di nengeri tu ngambika iya diputarka sida ti nemu sereta landik ba pekara nya.
Taja pia, ku iya, peranak tetap mantaika diri irau enggau asa ati dataika sida ngatur pengawa bejalai likun bebala mayuh di Miri, 6 Julai tu tadi.
“Bala ketuai bansa Dayak di Sarawak nyata deka muntang mutar nengah undang-undang tang ari ari sukut politik nadai ‘penau’ ngansak perintah nengeri ngubah Kanun Tanah Sarawak.
“Taja pekara nyata perintah nengeri seruran nerima mandat besai lebuh bepilih sekalika renggat nengeri enggau perintah besai, ari dua ketuai bansa Dayak ti megai pangku pengawa tinggi nyadi sapit kepala menteri ba Perintah Nengeri Sarawak, tang tu diperati ‘puntan’ gawa kelebih agi mutarka penanggul bekaul tanah NCR sereta mega ngenukuka PMPG.
Pia mega ku Elias, pengawa nguji mantaika ‘Rang Persendirian Ubah Kanun Tanah Sarawak’ ti dilanggur ADUN Ba’Kelalan, Baru Bian rambau DUN November 2017 nadai nerima sukung.
Nya alai, aum sekali tu ku iya dikearap ulih mantu mutarka penyarut ke nyadi ari isu bekaul tanah enggau ubah Kanun Tanah Sarawak, sereta meri pengelantang ngagai peranak ti udah lama nganti ‘kenuku’ enggau saut pasal tanah NCR enggau PMPG.