UPP udah nganjung surat rasmi nuju SUPP bekaul nginsil MoU
KUCHING: Pemutus nginsil sempekat pemereti ati (MoU) antara Parti Rakyat Bersatu ( UPP) enggau Parti Sa’ati Rayat Sarawak (SUPP) udah digaga rambau Aum Delegit Tiga Taun Sekali (TDC) UPP di Sibu kena 7 Julai tu tadi.
Sekretari Besai UPP, George Lo madahka raban sida enggau rasmi udah ngenuku ke pekara nya ngagai SUPP chara betulis tauka nengah surat kemari, 9 Julai 2018, lalu tu nyadi awak pemadu tumu bejalaika pengawa nya.
“Aku belalauka penerang berita ari Sekretari Besai SUPP, Datuk Sebastian Ting, ‘nyata nadai basa ari bala ketuai UPP dikena madahka (nginsil sempekat pemereti ati)’.
“Aku deka madah, pemutus nginsil MoU udah digaga rambau Aum Besai Delegit TDC UPP, Hari Enam, 7 Julai 2018 tu tadi.
“UPP nyemetak madah ngagai SUPP nengah surat kena pagi Hari Satu, 9 Julai 2018, awak pemadu dulu bejalaika pengawa nya,” ku iya nengah siti penerang berita kemari.
Ku Lo nambah, iya asa enggau ulah Ting ti diperatika iya kelalu jampat meragam sereta nyalahka UPP laban nadai madah ngagai SUPP lebuh pemutus digaga rambau TDC ujung minggu tu tadi.
Berebak enggau nya Presiden UPP, Dato Sri Wong Soon Koh lebuhka dirandau media pengudah ngulu aum Pra- Aum Kunsil Nengeri (DUN) kemari madahka MoU nya otomatik tekinsil berindik ari pemutus perintah nengeri Sarawak pansut ari Barisan Nasional ( BN) lalu numbuhka Parti Gabungan Sarawak (GPS).
“Ketegal BN udah nadai agi, nya alai MoU nya otomatik tekinsil,” ku iya nadai meri penerang silik bekaul enggau pekara nya.
Hari Minggu tu tadi, Ting madahka SUPP tekenyit enggau pemutus UPP enda nampung kerejasama ti dipesetuju dalam MoU disain sebedau Pengawa Bepilih Besai Ke-14 (PRU14) nyin tadi.
Iya mega besalahka ulah bala ketuai UPP lalu ngumbai pengawa nya enda bebasaka sempekat ti udah dikemataka Kepala Menteri Datuk Patinggi Abang Johari Tun Openg.
Pia mega ku iya, pemutus tu semina ditemu nengah berita bekaul enggau TDC, UPP di Sibu kemari.
Di baruh MoU nya, kededua raban dipinta bekerejasama rat dikena nentuka chalun ari kededua parti nya menang lebuh PRU14.
Kenu ku Ting, MoU nya nyadi pekara dipesetuju enggau komitmen kededua raban ngambika bisi gempung parti politik dalam raban bansa China enggau antara bala pengari rayat China dalam Perintah Nengeri.