Pintu penama ngagai BCF deka tembu sebedau 16 Julai
SIBU: Pengawa ngaga pintu penama ngagai siti atur pengawa ke tebilang, ‘Borneo Cultural Festival’ ( BCF) benung digaga enggau lanchar lalu dipelabaka ulih tembu sebedau 16 Julai tu, ku Sapit Chairman Opis Kunsil Majlis Perbandaran Sibu ( SMC), Rogayah Jamain.
Iya madahka pengawa ngaga pintu penama nya udah belabuh gawa kena hari Lima tu tadi.
“Au amat, ke sekali tu ukir ke pintu penama deka dipasukka enggau mayuh perengka ke bisi bekait enggau adat pesaka dibanding enggau baka ke udah,” ku Rogayah madah ngagai surat berita The Borneo Post ditu, kemari.
Pintu penama ngagai BCF nya ila, deka digaga sebuah panggau ke umbas iya pemesai (belakang pintu penama) ke tetiap raban etnik kena sida iya mandangka pengawa tauka main orang tuai kelia, ngepan sereta perengka guna musik tradisional.
Iya madah pintu penama nya nyadi entara perengka guna ke matak ati mensia mayuh ngagai BCF 2017, laban endur nya ke dikerindu mensia mayuh alai sida iya begambar enggau bala temuai.
Siti agi main ke deka dipandangka, iya nya ‘Tibau’ (baka ayun), ti mega matak mensia mayuh taun siti nyin tadi.
BCF, ke dipungkal dalam taun 2002 digaga laban deka mandangka bemacham chura adat pesaka dikembuan ulih menua tu, sereta bemacham etnik ke nguan menua Sarawak, deka dipunka ari 19 Julai ngagai 28 Julai tu ila.
Pengawa bejadika BCF taun tu deka digaga kena 20 Julai enda enti jauh ari pintu penama.
Ba taun siti nyin tadi (ari 20 Julai ngagai 29 Julai) pemayuh mensia ke bisi enggau ngulu atur pengawa tu, dirikod mujur matak urung 600,000 temuai, alai penyampau tu mayuh agi ari 2016.