SIDS patut dichunto NGO bukai di S’wak
KUCHING: Serakup Indu Dayak Sarawak (SIDS)tau nyadi chunto ngagai gerempung sereta serakup bukai ke ukai dikuasa Perintah (NGO)di Malaysia kelebih agi di Sarawak.
Sapit Kepala Menteri, Datuk Amar Douglas Uggah Embas madah mayuh NGO di menua tu saru penemu sereta limpang ari pemerat kuing tauka tuju numbuhka gerempung tauka serakup nya.
Tang SIDS ku iya, nadai kaul enggau politik ba pengawa sida laban gerempung nya nemu enti digulai enggau politik, semina deka mai penanggul.
“Enda muntang ke sebuah gerempung, serakup tauka opis mengkang tegut dalam siti timpuh ke lama baka SIDS.
“Ba aku pemujur SIDS bekau pangka tiga batang pengawa, iya nya keterubah ketuai iya ( Tan Sri Empiang Jabu)ke mayuh penau, betatika kaul kerejasama ke manah enggau Perintah lalu ke pengabis berat, iya nya ngembuan kaban serakup ke meruan.
“Nya alai, SIDS meruan datai ke seharitu lalu aku ngarapka chairman ke baru, Dato Ir Alice Jawan deka majakka pengawa ngaga kaul kerejasama ke manah enggau Perintah,” ku iya.
Iya madah munyi nya lebuh bejaku ba atur pengawa Makai Lemai Ulang Taun Ke-61 SIDS di sebengkah hotel ditu, kemari.
Ba atur pengawa nya, Uggah ti mega nyadi Menteri Ngemodenka Pengawa Betanam Betupi, Tanah Adat enggau Pemansang Menua Pesisir bisi meri ungkup urung RM50,000 ngagai SIDS.
Uggah mega ngarapka SIDS deka majak mantu Perintah ba pengawa ngurangka penanggul meskin di menua tu kelebih agi ba komuniti Dayak.
Ba lansa bukai, Empiang ke udah badu mangku pengawa iya nyadi chairman SIDS lebih 30 taun meri puji ngagai Perintah ke mayuh udah nyukung gerempung tu ngelama tu, baik nya dalam pekara wang tauka bantu bukai.
Ke taun tu ku iya, keteru- bah iya SIDS beserimbai enggau ulang taun ke-61 SIDA, serakup nya meri gelar ngagai anak kaban serakup ke udah mujur dalam pengawa lumba enggau main.
Empiang bngarapka chairman baru serakup nya, Alice deka majakka pengawa iya nyambung pemanah pengawa ke udah digaga ulih SIDS sepemanjai 60 taun tu ke udah.
Bekait enggau pekara nya mega, kelimpah ari nyambut hari ulang taun ke-61 serakup nya, iya mega bisi nyengkaum Aum Tiga Taun Sekali (TGA) SIDS.
SIDS ke ditumbuhka dalam taun 1957 ngembuan urung seramai 14,000 kaban ari 26 buah pampang di serata menua Sarawak.