Kpg Sg Mata Scheme mujur mansutka 150,000 tan nanas, untung RM10.5 juta semusin
KOTA SAMARAHAN: Sida ke bekebun nanas di Kampung Sungai Mata Scheme taja pan enda bemunyi tang udah mansutka asil 150,000 tan buah nya ke mai penguntung urung RM10.5 juta semusin.
Projek ke dipungkal Integrated Agriculture Development Agency (IADA) dalam taun 2004, ke pengabis iya mujur ari 80 raban sida ke bekebun nanas baruh pegai Opis Kaunsil Buah Nanas Malaysia (MPB) di Sarawak.
Menijer Projek nya, Sahat Tar lebuh dikerandau di kebun iya kemari madahka ke semua projek nya mungkur urung 600 ikar tang semina setengah ari tanah nya ditanam enggau buah nya ulih 170 penyereta.
“Ditu bisi urung 90 penyereta ke aktif bekebun ba 300 ikar kebun tu, sekeda nya bekebun ba tanah lima ikar, sekeda nya 10, 15 tauka 20 ikar,” ku iya.
Tetiap ikar tanah nya ku iya, ditanam enggau 17,000 buah ke ditama dalam timpuh semilan bulan sebedau iya diketau.
“uji nuan ngira, seikar 17,000 buah dijual RM3 sigi lalu didarab enggau penyampau ikar tanah tu ke dibagi enggau semilan bulan,” ku iya lalu nandu baru madahka paung nya ditanam tetiap ninting minggu dataika iya udah tuai mimit, ngambika bisi pemisi ke tetap ke sida ke bekebun lalu bisi mega bekal ngagai pemeli.
Taja pia, iya madah ungkus majak nambah, laban sida iya meli baja, rachun sereta paung kediri empu, nyengkaum mayar orang ke gawa.
“Aku ulih madahka pemisi tetap ari kebun semina RM3 ngagai RM4 juta, laban penyampau RM10.5 juta penyampau ke bedau beresi (gross) nitihka itung pen- yampau RM15,000 di ulih ari tetiap ikar tetiap musin, ke bedau disengkaum enggau ungkus,” ku iya.
Sahat mega madahka iya gaga ati meda penyereta kebun mega ngaga industri kotej, baka ngaga jam ari buah nanas, sos nanas, sereta ai kordial.
“nadai utai di buai, ketigatiga produk bisi peminta ke manah ari makit menua tu,” ku iya.
Sahat madahka sida nanam nanas ari mayuh macham purih baka K36, Josapine, Morris enggau Nenas Pound Sarawak – lalu bisi mega ditambah enggau hibrid buah nanas baka MD2.
Iya nandu baru madahka pemujur nyangka enda ulih dipeda baka kediatu enti nadai tulung ari Perintah Menua enggau Besai ke nyendiaka latih, iring sereta mayuh macham insentif ngagai sida ke bekebun.