Bisi 357 buah sekula primari di Sarawak diperambu digempung
KUCHING: Perintah nengeri gagit ati deka nempa kerejasama enggau perintah besai ba pengawa ngempung Sekula Kurang nembiak ( SKM) sekula primari, laban pelajar nyadi agenda pemadu beguna di nengeri tu.
Menteri Muda Pelajar enggau Pansik Teknologi, Dr Annuar Rapaee madah ngagai Kunsil Nengeri, pengirau sekalika pengawa ngempung sekula primari ke ngerejista mimit nembiak deka dipejalaika di baruh Pakatan Harapan (PH) ke nyadi perintah diatu, baka ti udah diperambu asal sebedau tu.
“Tang amat narit ati lebuh maya aum pengarang berita, Menteri Kerja Raya baru ( Baru Bian) beratka tiga pekara iya nya sepital, jalai enggau sekula,” ku iya.
Iya meri penerang nya maya sesi tanya saut aum Kunsil Nengeri Ke-18 Hari Kedua, ke diatur ba Kompleks Kunsil Nengeri, kemari.
Iya ngenang pekara nya lebuh ti nyaut tanya ari Paulus Palu Gumbang (Batu Danau) ti nanya Opis Menteri Pelajar, Sains enggau Pansik Teknologi kemaya proses ngempung enda kurang ari empat buah sekula ba sitak Batu Danau.
Nitih ku Dr Annuar, ba Sarawak naka ke diatu bisi 1,404 buah sekula lalu ari penyampau nya bisi 1,264 buah sekula primari. Ari penyampau nya (1,264 buah sekula) bisi 849 buah sekula primari ti ngerejista mimit nembiak.
“Penyampau semua sekula ke diperambu digempung di Sarawak iya nya 357 buah sekula primari ti ngerejista kurang ari 300 iku nembiak.
“Tu mih juluk kami kenyau diberi tanggungpengawa ba Opis Menteri, Pelajar, Sains enggau Pansik Teknologi,” ku iya.
Berebak enggau tu iya madahka atur pengawa ngempung sekula ke ngerejista mimit nembiak endang chukup engkeman baka pengajar khas ulih diengkah ba siti endur, kereban ulih dipegulaika lalu infrastruktur ulih digaga baru sereta dipekunsi entara bala nembiak.