BSN komited ngemanahka servis kelebih agi di menua pesisir

KUCHING: Bank Simpanan Nasional (BSN) bisi komitmen deka mansik sereta berunding deka ngemanahka agi servis kelebih agi di menua pesisir, dikena napi peminta guna rayat.

Menteri Muda ba Opis Kepala Menteri (Hal Ehwal Korporat), Abdullah Saidol madah, taja pan BSN ukai chara terus dibaruh pegai perintah tang perintah nengeri deka matau sereta beratka pekara bekaul enggau servis sereta pengelantang rayat.

“Kitai udah berandau enggau BSN lalu sida udah meri komitmen nambahka penyampau pengereja pengawa enggau servis ke bukai deka dikemanahka agi ngambika ulih meri servis pemadu man- ah ngagai rayat ti ukai semina ba Serian tang nyengkaum menua pesisir di pelilih menua bukai.

“Ngagai palan ti ukai semina ba Serian, BSN deka mansik sereta berunding nambahka penyampau pengereja pengawa sereta endur tauka opis ti senipak ungkup peranak di menua pesisir,” ku iya.

Abdullah mansutka pekara nya lebuh nyaut tanya ari John Ilus (Bukit Semuja) ba um Kunsil Nengeri (DUN) Ke18, Hari Kedua ba Kompleks DUN ditu,kemari.

Berebak enggau tu Abdullah madahka perintah diatu nadai perambu deka numbuhka dua palan begulai iya nya endur nyendiaka servis baka opis pos enggau bank.

Taja pia, perambu DUN Bukit Semuja nya manah sereta patut diperundingka lalu dipejalaika kelebih agi ba kandang menua pesisir tauka menua ulu.

“Perambu YB Bukit Semuja manah amat sereta patut diperatika, tang naka ke diatu nadai perambu khas ngaga siti palan ungkup opis pos enggau BSN.

“Tang servis pejabat pos lebih agi di menua pesisir diperambu diengkahka nengah Kaunter Pelbagai Perkhidmatan Bersepadu, lalu aku ngasaika tu deka meri pengelantang ngagai peranak menua pesisir bulih servis engkeman ari dua ejensi tu,” ku iya lebuh nyaut tanya tambah ari John.