Diatu bisi 93 projek tagang dipejalaika di serata nengeri

KUCHING: Menteri Muda Betanam Betupi, Dr Abdul Rahman Ismail madah naka ke diatu bisi 93 projek tagang dipejalaika di serata nengeri tu.

“Entara 93 projek nya bisi 11 projek udah ngayanka penyulut ti chukup meri peransang. Entara projek nya ke ulih dichunto iya nya Tagang Genturung Pendiau Terbat, Mawang ba Serian enggau Tagang Long Lidung, Lawas di Limbang.

“Sistem Tagang tu ditumbuhka dikena nyaga ngemanahka sungai di Sarawak,” ku iya lebuh ke nyaut tanya tambah ari Jefferson Jamit Unyat (Bukit Goram), kemari.

Dr. Abdul Rahman mansutka pekara nya lebuh sesi tanya saut ba aum Kunsil Nengeri Ke-18 ba Hari Kedua ti diatur ba Kompleks DUN ditu.

Bejaku baru Dr Abdul Rahman madahka deka mujur dalam sistem tagang begunaka kerejasama enggau pemereti ari semua piak kelebih agi kaban komiti projek tagang enggau peranak genturung pendiau nya.

Nambahka nya, iya madahka penerit atur ulih peranak genturung pendiau ti nentuka kandang endur projek nya dijaga sereta mega siti ari mai pemujur ngagai projek nya.

“Penyulut sistem tagang tu deka mantu nyungkak penatai pemisi peranak genturung nya nengah chara ngulihka ikan nitihka timpuh ditetapka kelimpah ari ulih nyadi ekodagang temuai dikena matak mayuh agi temuai datai,” ku iya.

Kelimpah ari nya lebuh ke nyaut tanya Jefferson sekalika Opis Betanam Betupi bisi perambu deka ngidupka baru Sistem Tagang ba Sungai Tisa, Yong, Kapit, Abdullah madahka opis nya deka ngenukuka dulu pemeresi sungai nya.

“Opis Betanam Betupi Sarawak deka nentuka dulu kualiti ai ba sungai Tisa sereta ngatur randau enggau peranak endur nya dikena ngulihka jaku setuju bejalaika sistem tagang ba endur nya.

“Nyema peranak endur nya setuju lalu kualiti ai dipeda manah tauka senipak, Opis Betanam Betupi deka ngidupka baru projek tagang nya,” ku Abdullah.