LKIM Miri agi meri Bantu Penyanding Pengidup ngagai orang berikan
MIRI: Lebih 400 orang berikan ditu ke direjista enggau Opis Kaunsil Kuasa enggau Pemansang Orang Berikan (Lembaga Kemajuan Ikan Malaysia tauka LKIM) Miri agi meri Bantu Penyanding Pengidup (BSH) ngagai orang berikan bulan tu.
Pegawai LKIM sitak Tiga Miri, Norlaila Baharuddin @ Hamdan madahka naka kediatu, opis nya nadai nerima atur ari Perintah Besai badu meri bantu nya ngagai orang berikan.
“Naka kediatu, nadai atur bisi diterima ngasuh bantu tu diketuka, tang taja pia, LKIM Miri deka majakka pengawa meri bantu tu, ngambika semina orang berikan ke endar nerima bantu tu,” ku Norlaila madah lebuh dikerandau ulih pengarang berita ba Rumah Terbuka ‘Ramah Tamah Adil Fitri’ ti digaga ulih LKIM Sitak Tiga Miri, kemari.
Sama bisi enggau ngulu atur pengawa nya, Penulung Pentadbiran pekara bekait enggau Korporat, Nurulainie Mohd Tahir, Menijer Besai Gerempung Orang Berikan ari Miri, Awang Ismail Awang Sharie, Liana Jailun ( Lawas), Stredella Romina Lynn (Limbang) enggau Malik Bol (Miri).
Ku Norlaila, opis nya tetap deka meri bantu nya ngagai orang berikan ditu, baka ngelama tu, iya nya ujung bulan tu ila.
Iya nandu baru madahka, enti udah bisi atur baru ulih opis menteri ngasuh ngetu meri bantu, opis nya deka ngetuka pengawa nya.
Kelimpah ari nya, iya madah, LKIM deka majakka pengawa sida iya ngemataka sapa entara orang berikan tu ke patut nerima bantu nya.
Iya nandu baru madahka, pegawai ke bejalaika kuasa deka mansik sapa orang berikan ke patut nerima bantu nya, nengah timbal semua renggat nyengkaum gerempung nya empu sereta ijinsi Perintah ke patut.
Iya madah, tetiap ninting bulan, opis nya nerima peminta baru, BSH lalu sekeda nya timpuh bantu ke patut digaga baru tauka diketuka.
Ba lansa nya mega, iya ngelalau LKIM Miri deka majakka pengawa sida iya baum enggau Gerempung Orang Berikan sereta ijiinsi Perintah ke patut, lalu beratika sida ke udah diberi lisin berikan ba zon ke udah ditetapka, A, B, enggau C enda masuk ngagai zon pangan diri.
Norlaila madah, LKIM Miri deka berati sereta ngulihka timbal ari kemplin sereta repot ulih ijinsi bukai, ngambika pengawa ngalahka sitak pangan diri nya enda digaga ulih gerempung tu.
Sama bisi ngulu atur pengawa Rumah Terbuka Ramah Tamah nya, bala pengereja pengawa opis perintah enggai ijinsi peribit, orang berikan sereta bala nembiak patu balu ari Komplek Hamidah Tudan.
Ba atur pengawa nya mega, bala nembiak patu balu nya diberi duit raya ulih KKIM Miri.
Bala temuai dijamu enggau pemakai ari menua tu, kek, ai irup sereta ‘Ikan Tahai’ ke dibai ari Lawas enggau dagin kerebau dipanduk enggau kichap ari Limbang, sambal belacan ari Bintulu sereta mayuh pemakai bukai.