MNS minta kerejasama hotel ngemunaska pengawa bebuaika butul ai plastik, straw
MIRI: Malaysian Nature Society (MNS) minta kerejasama raban hotel ngemunaska pengawa bebuaika butul ai plastik enggau straw, ke nyadi siti chara ngurangka pengawa bebuaika pengamah plastik ngagai tasik.
Chairman MNS pampang Miri, Iqbal Abdollah, ba siti penerang kemari madahka pengirau ati beratika uras datai ari plastik anyut sereta rarat niti tebing tasik Miri, lalu madahka pekara tu siti pekara ke berat ke enda tau enda dikemutarka ari pun.
“Industri hotel meli sereta nyadung pemayuh butul ai plastik ke pengelantang temuai lebuh diau tauka baum ba hotel sida iya.
“Taja pia, lebuh beratika bakani ku butul ai plastik meri empas ngagai tasik kitai, aku pechaya bisi chara bukai ke mujur agi ulih dikena sereta nyimat kos, lalu nyangka mai mayuh agi penguntung ngagai hotel,” ku Iqbal.
Miri ku iya, ke diangkatka nyadi ‘ Resort City’ (Bandaraya endur Belelak) sigi tebilang enggau tebing tasik ke panjai di Sarawak.
“Taja pia, uras ke dibuai lalu anyut ngagai tebing pantai ditu mandangka endur nya kamah, lalu ketegal nya, tau nyaru penemu temuai enggau komuniti ditu. Ketegal nya, bisi pemerat ba komuniti ke ngembuan pemujur runding sereta pemagas sida iya ngurangka uras di tasik.”
Iqbal nandu baru madahka berindik ari Hari Tasik Sedunya (World Oceans Day) ti dipungkal ulih MNS taun siti nyin tadi, pengawa ngemeresi tebing pantai sigi suah digaga.
“Iya ke bendar, pengawa bansa tu enda kala abis, meda gaya uras ke majak mayuh sereta anyut lalu rarat ngagai tebing pantai mayuh udah digumpul kami. Ke batang, kitai enda tau enda ngemutarka penanggul tu ari pun. Nya alai, ku aku, manah agi sengkaumka sekali piak peribit baka hotel enggau palan belelak,” ku iya.
Iya nandu baru madahka butul plastik ke baru dikena sekali lalu dibuai nyangka enda ulih buruk datai ngagai 450 taun lalu baka nya mega enggau straw ke enda buruk datai ngagai 200 taun tauka lama agi ari nya nganti barang tu but tauka buruk.
“Ke ngasuh barang tu jai agi, plestik tau pechah mit lalu nyadi mikro plastik ke ulih masuk ke dalam pemakai kitai, lalu udah nya pulai baru ngagai tubuh kitai,” ku iya.
Lebuh bekunsika penerang baru ari Gerempung Pengerai Sedunya (WHO) ti dikeluarka dalam bulan Mac 2018, Iqbal madah pansik nya madahka penusah ari plestik dalam ai irup ke bejenama beratika lebih ari 90 peratus bisi plastik alus.
“Utai ke ngirauka ati, iya nya nitih ku penerang ari Forum Ekonomi Dunya (WEF), sereta beratika pengamah plastik ke dibuai ngagai tasik sereta rarat niti tebing tasik di serata dunya, mayuh agi plastik ari ikan ditemu di dalam tasik manggai taun 2050 ila.
“Nyangka, tu maya iya raban hotel ngereja pengawa bansa tu, ke bela digaga ulih hotel entarabansa, nyendiaka temuai sida iya enggau gelas ke di isi enggau ai butul ke ulih suah dikena, stesen ai ke ditapis, enggau ‘dispenser’, enggau straw ti digaga ari aluminium ke ulih dikena baru.
“Kami ngarapka pengawa bansa tu chukup diangkatka, ngajar mensia mayuh ke bisi bagi dalam pengawa ngurangka uras plastik lalu bela nyaga pemeresi bandaraya sereta tanah kitak,” ku iya.