Opis Menteri Pelajar deka mansik enggau silik sentang mayuh pekara dikena nentuka perambu nya ukai semina dipejalai setengah jalai aja
SIBU: Opis Menteri Pelajar deka mansik enggau silik agi penemu deka numbuhka polisi ngemendarka nembiak mai gajet enggau kereban elektronik ngagai sekula dikena ngemujurka pengawa ngajar enggau belajar (PDP).
Presiden Gerempung Pengajar Sarawak (STU) Jisin Nyud madahka pansik nya beguna dikena nentuka perambu nya ukai semina ulih dikereja setengah jalai aja.
Iya madah, mayuh bengkah sukut patut diperatika dulu enggau silik nyengkaum ba pekara pengelikun sereta pemansang teknologi ke bisi maya dia.
“Ba aku, nitihka gaya infrastruktur teknologi ti bisi maya tu, pengawa bekenaka gajet
Ba aku, nitihka gaya infrastruktur teknologi ti bisi maya tu, pengawa bekenaka gajet enggau kereban elektronik di sekula enda mayuh ngenataika penguntung. Jisin Nyud Presiden STU
enggau kereban elektronik di sekula enda mayuh ngenataika penguntung.
“Kitai udah bisi komputer binching ke dikena nembiak tang nembiak meseti bisi kad SIM diri empu nyema bekenaka internet.
“Pia mega baka ‘Wifi’ ti disediaka di sekula bela empai ulih nentuka gajet enggau kereban elektronik mujur nyaup PDP laban pengelaju iya bangat lubah,” pia ku iya madah.
Ku Jisin, iya ke lebih agi beguna diatu iya nya nyediaka infrastruktur teknologi ba tiap bengkah sekula baka di makmal komputer.
“Semua kitai nemu kereban baka tu meseti kena ‘update’ belama tang enti infrastruktur enda chukup perambu nya mega nadai ulih dikena tauka dipenyadika,” ku iya nerang.
Berindik ari nya, iya minta perambu mai gajet enggau kereban elektronik ke sekula meseti diperatika silik dulu sebedau ngaga pemutus bejadika perambu nya di sekula.