Indu dara Dayak ditesau ngambi bagi ba Pekit ‘Miss BDCF 2018’

SIBU: Komiti Pengatur Pekit Pemajik ‘ Miss Pengerami Mantaika Main Asal Dayak Borneo (BDCF)’ 2018 sekali agi nesau indu dara Dayak ngambi bagi ba pekit nya.

Pekit tu deka diatur kena 23-25 Julai tu ba Dataran Bandar Sibu Fasa I.

Atur enggau pekit tu iya nya penyereta meseti indu dara ke beumur antara 18-30 taun.

Pemekit meseti ngembuan peninggi enda kurang ari 5 kaki 2 inchi.

Pekit tu mega deka diatur tiga kali renggat lalu renggat keterubah diatur kena 23 Julai dikena milih 10 iku finalis.

Finalis nangkan ke nya deka dikangau baru ngulu ‘showcase’ ke diatur kena 24 Julai.

Renggat kepenudi iya nya final ‘Miss BDCF 2018’ diatur kena 25 Julai.

Semua tiga bengkah renggat tu diatur ba panggau BDCF berengkah jam 9 malam.

Pemekit deka diberi puin nengah pemajik (70 peratus), ngepan (20 peratus) enggau pemanah tubuh/ pemerani diri (10 peratus).

Gelar ‘Miss BDCF 2018’ deka mai pulai perais RM2,000, jumpang, selampai, troi, hamper enggau bungai.

Penuduk lumur dua enggau tiga mai perais RM1,500 enggau RM1,000 sereta bela disempulang selampai, trofi enggau hamper.

Penuduk lumur empat enggau lima bela mai perais RM350 enggau RM300 sereta disempulang selampai.

Perais sagu ati ngagai lima iku pemekit mai perais RM200.

Bayar enggau pekit tu RM30 lalu nama meseti direjister enda laun ari 14 Julai, jam 1 lemai.

Penerang silik tau ditanya ba Angeline Uchi Maseng di talian 016-8825861 enggau Senorita Salleh ( 0138061265).