Raban polis Kapit udah ngatur Pengerami Gawai Dayak, Hari Raya

KAPIT: Raban Polis Kapit ditu mujur ngatur dua pengerami iya nya Pengerami Gawai Dayak enggau Hari Raya Aidilfitri 2018, ti digaga bepalan di Indu Opis Polis Kapit di Jalai Selirik ditu, lemai kemari.

OCPD Kapit DSP Freddy Bian madahka pengerami tu iya nya aktiviti rama sida lalu diatur ninting taun sereta digulu semua staf ke gawa di Kapit. Sekali tu ku iya dua hari besai diintu berebak dalam siti pengerami.

“Pengerami tu udah diatur raban Pertubuhan Sosial Kebajikan Dan Rekreasi Warga Polis Kapit ( PERKEP). Batang tuju atur pengawa dikena ngerami dua hari besai, Gawai Dayak enggau Hari Raya ti bela diintu dalam bulan Jun.

“Sekali tu kami nadai bebelika pemakai ari luar. Tetiap opis ari raban polis baka Opis Pengatur Pengawa enggau Logistik, Cawangan Khas, Opis Pemansik Penyalah Berat, Opis Narkotik, Atur Trafik enggau Mensia Mayuh sereta ke bukai bela nyediaka pemakai ngambika dikunsi malam berami,” ku DSP Freddy.

Bemacham bansa pemakai asal bansa Dayak enggau Melayu bisi dinah. Antara pemakai asal bansa Dayak baka ikan pansuh, manuk pansuh, sayap manuk panggang, asi pulut, lalu pemakai Melayu baka rendang chapi, satay manuk, satay chapi, kari manuk, asi briani kuning, panggang, bihun goreng, mi goreng, kek lapis, buah sereta ke bukai.

Antara bala bisi datai Pemesai Mangku Pengawa Opis Pengatur Pengawa enggau Logistik ASP Chiew Swoi Kee, Pemesai Cawan- gan Khas ASP Chua Su Hua, Pemesai, Opis Pemansik Penyalah Berat ASP Makkaranu Beddu, Pemesai Atur Trafik enggau Mensia Mayuh ASP Fauzan Kasim, Pemesai Opis Narkotik ASP Jawie Hamata, Inspektor Norita Mohd Khairi, Inspektor Muhd Nizam Mohd Izhar, Inspektor Firdaus Mahadi, Inspektor Ugendran Ne- saratnam, Inspektor Mackey Anyut, sereta bala pemesai bukai.

Antara pengawa pemerindang malam nya baka karaoke enggau tanda poco-poco.

MAYUH MACHAM PEMAKAI: OCPD Kapit DSP Freddy Bian disempulang bala ketuai opis bukai bejalai meda pemakai ke bisi dinah. Ari kiba, ASP Chiew Swoi Kee, OCS Sergeant Major Hosen, DSP Freddy Bian, ASP Chua Su Hua, Jawie Hamata enggau ASP Makkaranu.

SELAMAT HARI GAWAI-RAYA: DSP Freddy Bian muji pemakai ti bisi disediaka raban ari Opis Pengatur Pengawa enggau Logistik.

NYAMAI: OCS Sergeant Major Hossein, ASP Chiew Swoi Kee, DSP Freddy Bian, ASP Fauzan Kasim enggau ASP Jawie Hamata bela berandauka bansa pemakai ke bisi dinah malam pengerami nya.