Dr Annuar dekaka projek ngaga sekula tuai sereta jai ditembu lengkas

KUCHING: Menteri Muda Pelajar enggau Pansik Teknologi, Dr Annuar Rapaee madahka bisi 52 ari 66 projek ngemanah tauka ngaga baru sekula tuai sereta jai di baruh Opis Menteri Pelajar, lubah ari timpuh ke udah ditetapka.

Nyaut tanya ari Kaban Kunsil Nengeri ( ADUN) Sadong Jaya Aidel Lariwoo maya sesi tanya saut Aum Kunsil Nengeri Ke-18 ba Hari Ketiga kemari, Dr Annuar madahka tujuh ari 66 projek nya dipelabaka deka tumu tembu ari ke ditimpuh lalu tujuh ari 66 projek nitihka timpuh.

Nitih ku iya, projek ngaga sekula tuai sereta jai ba nengeri tu ke dipejalaika Opis Kereja Raya (JKR) bisi enam ari 50 projek lubah ari ke udah ditimpuh.

Lalu enam ari 50 projek dulu ari ke udah ditimpuh sereta 38 ari 50 projek nitihka timpuh ke udah ditetapka,ku iya.

“Berindik ari pekara tu, kitai dekaka pengawa ngemanah enggau ngaga baru sekula tuai sereta jai ba nengeri tu dikereja enggau lengkas, tang baka ke ditemu JKR Sarawak bejalaika pengawa manah agi ari Opis Menteri Pelajar.

“Nya alai kami ngarapka pengawa ngemanahka sekula tu patut dipejalaika perintah nengeri nengah Opis Menteri Pelajar, Sains enggau Pansik Teknologi awakka kitai ulih suah matau sereta nentuka sekula nya tembu nitihka maya ti ditetapka,” ku iya.

Kelimpah ari nya, Dr Annuar madahka penyampau ungkup belanja RM1 juta ari perintah besai ke udah dikemendarka dalam bajet sebedau tu, ke bendar enda chukup dikena ngemanahka semua sekula ke udah tuai sereta jai di nengeri tu.

Iya madahka dikena bejalaika 116 projek begunaka ungkup belanja sepenyampau RM419 juta.

Nambahka nya, iya madahka ba sitak DUN Sadong Jaya bisi dua buah sekula deka dikemanahka iya nya SK Jemukan enggau SK Jaie tang bedau nemu kemaya dipejalaika.