Ubah ba seksyen 28 ulih mutarka penanggul NCR

KUCHING: Ubah ba seksyen 28 ti nyerara Kandang Menua Bansa Asal (NTD) ari hak ngempu sementara nyadi jamin tambah NTD enggau tanah adat bansa asal (NCR).

Kaban Kunsil Nengari (ADUN) Samalaju Majang Renggi lebuh ti bejuraika Rang Undang- undang (RUU) Kanan Tanah (Ubah) 2018 kemari madah, ubah ba seksyen 28 nya dipeda ulih mutarka penanggul ti tebantai ari pemutus kort federal.

“Ambika chunto, kes Tr Nyuntan ke alai kort federal ngemutuska pengempu tanah nadai hak mintabaru tanah nya tang semina bisi hak minta tauka nerima pampas.

“Nengah ubah ba Seksyen 28 tu, kandang tanah ke udah diberi tauka diengkah di baruh hak ngempu sementara patut disukat dikena nentu ngambika NCR enggau NTD diseliahsebedau dokumen ngempu dipansutka.

“Reti iya, hak ngempu sementara enda ulih dipejalaika nyentuk ke pengawa nyukat udah dipejalaika ba NCR enggau NTD. Enggau reti ke bukai, NTD diseliahka dulu sebedau ngeluarka dokumen ke betul ngagai tanah nya,” ku iya.

Kelimpah ari bisi pemanah ngagai RUU Kanun Tanah ( Ubah) bisi mega pengelemi tauka pengurang iya nya lebuh NTD nya semina diungkupka naka pemesai 500 hektar aja, ku iya.

“Pemesai tu enda chukup ba sekeda endur ti bisi mayuh penyampau tubuh.

“Nya alai enggau tu aku minta ngambika RUU tu berati baru ngagai kandang NTD dikerembai tauka dikemesaika ngagai lebih 500 hektar nyema peminta nya bisi pematut sereta bisi merit,” ku iya.

Bejaku baru iya madahka RUU nya ngayanka pengeran sereta pemendar perintah deka nyaga enggau ngetanka tanah NCR.