Perintah Nengeri deka ngelaban pulai baru dawa ba sebarang kort ke kedeka sida
KUCHING: Sarawak enggai ngaku alah lalu majak deka mantah enti Petronas agi mengkang deka meri nutis tauka minta kes minyak enggau gis dibecharaka.
Udah kitai menang, hak nya engi kitai lalu enti sida iya deka mai kitai bechara baru, kitai tetap ngelaban, ba sebarang kort pan ke kedeka sida iya, laban tu hak kitai nyaga pengeraja asal kitai empu. Datuk Patinggi Abang Johari Tun Openg Kepala Menteri
Kepala Menteri Datuk Patinggi Abang Johari Tun Openg madah, Perintah Nengeri deka ngelaban pulai baru dawa nya, baik nya ba sebarang kort ke kedeka alai sida iya meri nutis tauka nyaman, ke pemerat hak ba pengeraja asal menua tu.
Ku iya, Sarawak nemu iya bisi kuasa nyaga pengawa minyak enggau gis taja pan napi dawa di Kort Besai bedau lama tu tadi.
“Tang kitai ngelaban pulai baru, kitai bisi luyar kitai empu ke betuaika Sharifah Hasidah (Menteri Muda Undang- Undang, Kaul Perintah Menua enggau Besai sereta Ngemataka Projek) begulai enggau Tuai Luyar Perintah Menua, lalu pengujung iya kitai menang di Kort Besai.
“Udah kitai menang, hak nya engi kitai lalu enti sida iya deka mai kitai bechara baru, kitai tetap ngelaban, ba sebarang kort pan ke kedeka sida iya, laban tu hak kitai nyaga pengeraja asal kitai empu,” ku iya.
Iya madah munyi nya lebuh bejaku ba atur pengawa ‘Majlis Gawai Raya PBB Zon Kuching 2018’ ke bela digulu ulih Sharifah Hasidah ti mega nyadi chairman pengatur atur pengawa nya di Palan Konvensyen Penview (PCC) ditu, malam kemari.
Abang Johari nandu baru madahka, kena hari Dua tu tadi, ‘Ordinan Perlombongan Minyak 1958’ (OMO58) mujur digaga manah agi pengudah aum Kunsil Nengeri (DUN) ngemendarka ubah Ordinan nya.
Ku iya, ubah nya ngujungka Sarawak diberi kuasa nyaga minyak enggau gis di menua tu.
Berindik ari pemendar ordinan nya, Abang Johari madah pemujur nya ke gaya dudi hari Sarawak sereta ke pemerat pemansang menua pesisir di menua tu.
“Ambika chunto, di sitak menua pesisir agi mayuh ke nadai bekal elektrik enggau ai.
“Penanggul nya nyadi laban sebedau tu, kitai nadai jalai bukai tang nganti ungkup ari Perintah Besai mayar pemansang infrastuktur nya.
“Tang kitai udah mutus ngambika enda ibuh bepanggai ba wang turu Perintah besai agi tang ngena wang turu kitai empu,” ku iya.
Iya nandu baru madahka, pengudah OMO58 dikemen- darka, enti deka ngulihka wang turu nya, Sarawak meseti bisi pemisi tegap kediri empu, kelebih agi datai ari asil minyak enggau gis menua tu empu.
Nya alai ku iya, Sarawak sigi begunaka asil nya dikemutarka kediri empu.
Ba lansa bukai, bekait enggau Gabungan Parti Sarawak (GPS) ba renggat Parlimen, iya madah parti nya deka nyukung Menteri Besai Tun Dr Mahathir Mohamad enti pekara nya bisi kaul enggau pemerat menua enggau Sarawak.
“Enti bisi kaul enggau kitai, kitai deka nyukung lalu enti nadai kaul, kitai enda nyukung.
“Iya (Tun M) nemu pasal pekara tu, lalu aku pan udah betemu enggau pemesai PH bukai lalu sida iya pan mereti utai ku aku,” ku iya.
Atur pengawa nya mega bela digulu ulih bini Kepala Menteri, Datin Patinggi Datuk Juma’ani Tuanku Bujang, Mandal Presiden Kanan PBB, Datuk Seri Fadillah Yusof, Sekretari Besai PBB Datuk Alexander Nanta Linggi, Ketuai Indu PBB, Dato Sri Fatimah Abdullah, Sapit Ketuai Pemuda Fazzrudin Abdul Rahman sereta pemesai PBB bukai. KUCHING: Pengawa Opis Kunsil Majlis Perbandaran Padawan ( MPP) nangkap ukui TVNR (Trap, Neuter, Vacibate and Release) laban deka ngemutarka penanggul ke dibantai ulih rayat.
Penerang nya digaga laban nyakal penemu penerang ti dipansutka ulih Gerempung Nyelamat Jelu ke Ditejuka ( Persatuan Menyelamat Hidupan Terbiar tauka SOS), Kuching kena 7 Julai tu tadi.
Ku penerang nya ti digaga begulai enggau Pemangku Direktor Opis Perkhidmatan Veterinar Sarawak, Dr Adrian Sudin Ambud enggau Ketuai Pengerai Mensia Mayuh, Opis Menteri Kandang Menua enggau Pengawa Berumah Sarawak, Dr Cheong Yaw Liang madahka siti ari pengawa besai opis kandang menua nya, iya nya ngemutarka penanggul mensia mayuh, lalu ngurangka penusah ngagai komuniti.
“Dalam suku ke penudi iya endar dalam bulan Jun taun tu, MPP nerima mayuh endar dawa ari mensia mayuh ke madahka mayuh ukui dilepaska sesegau di Batu 10 Padawan majak mangah, lalu penanggul bansa tu tau nganu mensia mayuh ke diau di sitak nya.
“Berindik ari nya, MPP nimbal engga jampat, alai kami nganjung raban kami ngagai sitak ke didawa nya, lalu bisi tetemuka empat iku ukui sebelah nya ke diperatika bisi gaya penyakit rabies,” ku iya.
Penerang nya madahka seiku ari empat iku ukui nya udah dituchuk enggau TNVR laban udah dipasukka kolar PVC.
“Kami nimbal dawa nya nitihka prosedur operasi stindit (SOP) ke dirintai ulih Komiti Pengatur Penyah Penusah Menua, kaban kaunsil opis kandang menua, enda tau enda lengkas mindahka ukui ke sesegau nya, lalu nganjung ukui tu ngagai makmal Diagnotostik Veterinar Menua, ngambika ulih diperesa enggau silik agi,” ku iya.
Ku iya, nitihka Seksyen 37 (2) enggau 3, Ordinan Pengerai Mensia Mayuh Veterinar 1999 (VPHO 1999) Opis Perkhidmatan Veterinar Sarawak, ngambi atur ngemunaska rabies di emnua tu, lalu laban ukui nya di sitak ke kena rampit rabies, opis nya nindukka ukui nya kena ngulihka sampel (chunto).
“Ke penemu mensia mayuh, kami sigi bisi tetemuka ukui TVNR ke ditemu positif kena rampit rabies. Nya alai, kami ngelalau orang bukai ngambika sida iya enda kena badi bansa tu,” ku iya.
Iya nandu baru madahka, mensia mayuh dilalau ngaga ripot ngagai opis ke bekuasa bekait enggau enti sida iya bisi meda ukui tauka jelu, ulah sida iya nyadi mangah tauka bisi mandangka gaya kena rabies.
“Kami mega ngelalau mensia mayuh ngambika sida iya nemu, enda nupi jelu ke enda ditemu penatai tauka udah diberi vaksin ke besau, laban ukui enggau mayau nyangka pemaik virus nya. Pejalai ukui ari sitak ke dipelabaka bisi kena rampit rabies sigi ditagang lalu tau kena ukum nengah seksyen 37, VPOH 1999 datai ngagai RM5,000.
“Sida ke bisi ngempu tauka bisi nupi jelu, betatika jelu nya dituchuk enggau vaksin rabies lalu beratika iya dikurung dalam kandang rumah kita,” ku iya.