Ketuai raban bansa sereta komiti JKKK Poyut/Lubok Nibong pegai DUN Mulu nemuai seraya belajar ngagai Sabah
MARUDI: Sepenyampau 31 iku ketuai raban bansa enggau tuai rumah sereta bala kaban komiti Pemansang enggau Pengelikun Genturung Pendiau (JKKK) ari sitak Poyut/Lubok Nibong pegai DUN Mulu, udah ngatur pejalai seminggu nemuai seraya belajar ngagai Sabah, apin lama ke udah.
Pejalai nemuai seraya belajar nya ari langgur penemu lalu udah dilangkar Sapit Speaker DUN ke mega Kaban Kunsil Nengeri ( ADUN) Mulu, Datuk Gerawat Gala, ti melanja penemuai nya enggau saup belanja ari Kaban Parlimen (MP) Baram, Anyi Ngau.
Seraya di Sabah, sida sebuat dibai nemuai ngagai bemacham endur ti manah baka ngagai Ladang Teh Sabah, ladang betupika sapi di Kundasang enggau palan pematak dagang temuai bu- kai, meri pengelala ngagai sida bekaul enggau produk dagang temuai ti tau dikemansang di sitak menua sida empu lalu nyadi produk eko-dagang temuai di luar Mulu.
Gerawat mega madahka penemuai nya dikearap meri penemu ngagai sida, baka ni ngintu enggau nyaga rampa menua ngambika meruan manah dipeda sereta nyadi pematak penatai bala temuai ngagai Mulu.
“Berebak enggau nya, penemu tu udah mujur nempa kerejasama enggau pemanah kaul antara bala ketuai raban bansa sereta bala bukai laban penemu tu disereta pupu bansa di Mulu baka Iban, Orang Ulu, China enggau Melayu,” ku iya nambah.
Nangkan nya penemuai nya mega bela diembing pemesai ari Opis Pelilih Marudi, Nancy John Abau.