Nadai kes salah bekaul rega barang diripot di Mukah sekumbang SKHBMP Hari Raya
MUKAH: Nadai kes salah ti bisi diripot raban pedagang ba sitak Mukah semanjai timpuh ‘Skim Kawalan Harga Barang Musim Perayaan’ (SKHBMP) Hari Raya Aidilfitri tu tadi.
NItih ku Ketuai Pampang Opis Menteri Dagang Dalam Menua enggau Pekara Bekaul Penguna (KPDNHEP) Mukah Moss Baok, piak sida udah bejalaika sepenympau 245 iti pengawa meresa semanjai timpuh nya lalu tetiap pedagang dipeda nitihka atur ti udah ditetapka.
“Nadai sebarang penyalah ti bisi diripot semanjai timpuh meresa nya dipejalai maya Hari Raya Aidilitri,” ku iya lebuh pengerami ‘Majlis Ramah Tamah Gawai Raya KPDNKHEP Mukah tengah hari kemari.
Tang, mayuh kes salah ke bisi diripot iya nya sepengudah timpuh skim rega musim pengerami nya abis.
“Nyentuk 9 Julai 2018, semina 45 iti kes iya nya ti ngaul mayuh macham penyalah,” ku iya nerang.
Entara nya ti ngaul Akta Perihal Dagangan ( empat kes), Akta Timbang dan Sukat 1972 (16 kes), Akta Kawalan Harga ( 22 kes), Anti Pencatutan 2011 (dua kes) enggau Akta Perlindungan Pengguna 1999 (satu kes).
Semua penyampau ke udah ditangkap iya nya RM16,008.20 lalu penyampau ukum iya nya RM6,300.
Ba kenang ti sama, Moss mega udah minta bala penguna ngambika terus ngaga ripot ngagai sida enti bisi pekara ti bekaul dipeda nyadi nengah medium ti udah disediaka.
Entara nya ngena pengawa ngeripot terus ngagai opis, ngena chara betelefon ngagai opis tauka ke muntang agi iya nya nengah chara ‘on-line’.
“Kitai endang ngarap kerejasama ari bala penguna kelimpah ari matau ninting maya ke dipejalaika bala pemesai,” ku iya nambah.
Pengerami ‘Ramah Tamah Gawai Raya’ nya mega sama bisi disereta mayuh ejensi sereta klien KPDNKHEP Mukah.