80 iku udah ngulu kimpin meri darah ke diatur SMC kemari

SIBU: Lebih 80 iku datai ngemujurka kimpin meri darah ke diatur Kelab Lumba, Main enggau Rama Opis Kaunsil Sibu ( SMC) ba opis sida Tingkat 24, Wisma Sanyan ditu, kemari.

Chairperson komiti pengatur Jessie Tingmadah, tebal agi sida ke datai tu iya nya ari Mafrica, raban Pen- yangkai Rajang (RPA), Opis Residen, Opis Kaunsil, Opis Asil Dalam Nengeri (LHDN) enggau SMC empu.

Ting madah, tuju komiti sida ngatur kimpin nya endang deka nyaup Bank Darah Sepital Sibu nambahka penyampau setuk darah ba sepital nya.

“Ari pengawa baka tu, kitai bela ulih besaup enggau pangan diri ngiga setuk darah ti bangat beguna ngagai sida ti bekenaka darah,” pia ku iya madah.

Iya mega madah, kelimpah beguna amat ba sida ke sakit, orang ke meri darah bela ulih ngurangka agi awak ditepan penyakit tungkul ati enggau kanser.

Ba pekara bekaul, iya madah, kimpin nya endang diatur gerempung sida ninting taun.

“Kitai temegah ati laban program tu semampai nerima sambut ke manah alai taun tu taun keempat kami ngatur,” ku iya sambil madahka kimpin nya belabuh 9 pagi nyentuk 12.30 tengah hari.

Sama bela datai maya tu iya nya Presiden gerempung nya, Tonny Wong.