Hak ngempu NTD diberi enti hak ‘usufructuary’ udah ditegap

KUCHING: Sapit Kepala Menteri Datuk Amar Douglas Uggah Embas madahka pengudah hak ‘usufructuary’ ditegapka, Native Territorial Domain (NTD) deka diberi surat hak ngempu tanah guna sama bansa asal, ti meri hak ngempu NTD nya.

Ku Uggah ti mega Menteri Betanam Betupi Moden, Tanah Adat enggau Pemansang Kandang menua, nya deka meri hak ngempu NTD ngagai komuniti.

“Dalam jaku bukai, sida (komuniti) ngempu NTD nya, ukai semina hak ngena. Tau ngena tau ngempu.

“Aku ngarapka pekara tu deka ulih muai pengirau pasal isu tu. Tu meh asil proses.

“Lalu aku ngarapka bakih sepiak nyin (penyakal) ulih madah ngagai bakih sida ke bukai maya sida ngatur pengawa mantah di Bintulu, ngambika ngemetulka nama utai ke dipadahka sida ‘tau ngena tang enda tau ngempu’ tu salah, wayang kulit, main politik,” ku iya.

Uggah mansutka pekara nya lebuh ti nyimpul jurai bekaul enggau Rang Undang-undang (RUU) Kanun Tanah (Ubah) 2018, pengudah ubah nya dikemendarka Kunsil Nengeri ba Aum Kunsil Nengeri Ke-18 Hari Keempat ba Kompleks Kunsil Nengeri ditu, kemari.

Ku iya, reti ‘usufructuary’ semina nerang pasal adat enggau pengawa dikemeran ti deka dikelala undangundang ba ungkup ke diubah dikena numbuhka hak ngempu NTD.

Iya nerangka pekara nya dikena iya nyaut tanya Kaban Kunsil Nengeri (ADUN) Krian enggau Bintulu ( maya bejuraika RUU nya, ti madahka RUU nya enda ulih dipelaba laban semina meri hak usufructuary, iya nya ulih dikena tang enda ulih ngempu tanah nya.

Uggah madahka penerang kededua ADUN nya mandangka seduai nya enda meretika RUU nya.

Kelimpah ari nya, dalam aum pengarang berita Uggah madahka kelimpah ari RUU Kanun Tanah (Ubah) 2018 dikemendar lalu perambu ubah Seksyen 6A (3) dikemendar, iya madahka ubah ketiga ba undang-undang nya muai akta ti dikemendarka ba taun 2000 suba laban sekeda seksyen dia enda dikena. KUCHING: Kaban Kunsil Negeri (ADUN) Simunjan Awla Dris minta perintah negeri numbuhka Palan Orang Dagang Bumiputera di Pelilih Simunjan.

Palan nya ku iya, deka nyadi palan ngempuru orang dagang di pelilih nya lalu nyadi palan nyual produk enggau asil pengelandik jari sida.

“Palan nya deka ngempuru produk betanam betupi rayat baka ke buah nenas, pisang enggau jagung.

“Pia mega asil berikan peranak Simunjan baka ikan enggau undang ulih dijual ba palan tu lalu udah tentu deka nyaup nambah penatai pemisi sida,”ku iya.

Awla mansutka jaku rambau debate ba Aum Keterubah Penggal 3 Dewan Kunsil Negeri(DUN) Ke 18 ditu, kemari.

Awla nambah, pinta nya berat lalu ulih mantu peranak Simunjan ngulihka pemisi tambah kelimpah ti matak orang luar datai ke Simunjan.

“Kelimpah ngangkatka pemisi rayat, palan ulih ngelaku Pelilih Simunjan,” ku iya.

Ngenang kaul bukai, iya minta perintah nyendiaka lampu jalai ba jalai nuju Simunjan kelebih agi ba Jematan Batang Sadong.

Kelimpah ari Jematan Batang Sadong, Awla mega dekaka Jematan GedongSimunjan bela disikap ngena lampu.

“Jematan tu enda disikap ngena lampu ke chukup lalu ngeruga pengelikun orang ti bebai perengka pengangkut betengahka jematan nya,” ku iya.