Perintah dipinta ngagai jalai ari Rh Empi ngagai Rh Megong

KUCHING: Kaban Kunsil Nengeri( ADUN) Tellian Yussibnosh Balo minta perintah ngaga jalai nyambung Rumah Empi, Nanga Sikat nuju Rumah Megong Nanga Taroh di Mukah.

Ku iya, Ulu Sikat enggau Sebakong entara genturung pendiau besai ke diuan bansa Iban lalu mengkang tinggal ba pekara pemansang.

“Genturung pendiau tu nadai atur penyambung jalai alun lalu pia mega nadai bekal ai sereta lekterik.

“Peranak dia betengahka sungai enti deka mindah ngagai kandang endur bukai,”ku Yussibnosh rambau debate ba Aum Dewan Kunsil Negeri(DUN) Ke 18 ditu, kemari.

Iya nambah, kandang endur nya bisi empat buah rumah panjai ke diuan urung 1,700 iku orang.

Rumah panjai ku iya semina ulih digusung nengah sungai enggau jalai batang.

“Ketegal nadai atur penyambung ke menyana, peranak diak enda ulih ngasai perengkaguna perintah baka ke sekula, sepital perintah enggau ke bukai.

Naka ke diatu ku iya, perintah benung ngaga projek Jalai Ulu Sikat - Sebakong pemanjai 9.5 km( fasa 1) lalu nya nyengkaum jalai nuju Rh Empi, Eh Radin enggau Rh Randi.

Tuju projek iya nya nyendia atur penyambung ke menyana ke nyambung Jalai Sebakong/ Ulu Sikat nuju SK Lubuk Bemben enggau rumah panjai( Rh Balai, Rh Jantai, Rh Seman enggau Rh Megong).

Projek nya ku iya mungkur pengawa ngaga jalai pemanjai 10 km nitihka standard JKR R1 lalu begunaka belanja RM88 juta.

Kelimpah ari nya, Yussibnosh mega merambu perintah ngaga Jalai Kpg Medong/Lebrasau/Klid, Dalat pemanjai 11 KM nitihka standard JKR R1 ti begunaka belanja RM44 juta.