Program volunter ‘722 Family Clean Up Day’ deka diatur kena 22 Julai tu ba Dalat
SIBU: Beberapa iku orang kaban volunter ke udah ngaul diri enggau kimpin ‘ Run For Love’ ke udah ngatur program ‘722 Family Clean Up Day’ kena 22 Julai tu ba Dalat berengkah ari pukul 3 lemai.
Chairman pengatur program Loh Yu Yee madah, program nya diatur beserimbai enggau ngintu Hari Sarawak Merdeka kena 22 Julai.
“Lebuh kitai deka ngemujurka program tu dikena ngintu Hari Sarawak Merdeka, kami mega deka ngenataika siti pekara ngagai rayat Sarawak bekaul pemerat nyaga pemeresi pantai.
“Tu mega dikena nentuka rebak baru ulih ngasaika gaya pantai ti beresi lalu nadai dikeruga,” ku iya.
Loh madah, mensia mayuh endang dikearap nyereta program nya dikena ngerichahka agi pengawa nya kelimpah ulih bekerejasama meresika pantai.
Ku iya nandu, semanjai program nya digaga sida mega bisi ngaga promosyen meri penyedar ngintu pemeresi tasik enggau rampa menua.
Nyema bisi orang ti ingin deka nyereta program tu ulih telefon ngagai Justine ba lumur 0128919638 ungkup pelilih Sibu, lalu Boris ( 0138080032) tauka Min Lee (01909674382) ungkup pelilih Dalat.