Dua buah genturung pendiau di Tanjung Datu deka bisi bekal elektrik dalam taun 2018 tu

KUCHING: Dua genturung pendiau di Tanjung Datu, Kampung Melano enggau Kampung Serabang deka bisi bekal lektrik ba taun 2018 tu.

Menteri Muda Bekal Lekterik Menua Pesisir Datuk Abdul Rahman Junaidi madah pengawa nyendia bekal letrik di kededua genturung pendiau nya benung diadu diatu.

“Projek bekal letrik menua pesisir tu ngena agih belanja RM23.5 juta lalu deka mai pemaik ngagai 77 ruang bilik di kededua genturung pendiau.

“Nengah Program Ubah Menua Pesisir( RTP), urung 103 ruang bilik udah bisi bekal lektrik ba taun 2017 nengah belanja RM515,000,” ku Abdul Rahman.

Iya mansutka jaku nya nyaut tanya Kaban Kunsil Nengeri(ADUN) Tanjung Datuk Amar Jamilah Anu rambau Aum Dewan Undangan Negeri(DUN) ditu, kemari.

Ba taun 2018 ku Abdul Rahman nambah, 231 pinta disambung bekal lektrik bisi diterima ari DUN Tanjung Datu lalu deka dikemujur.

Ngenang kaul ke sama, iya madah 98 peratus genturung pendiau di Tanjung Datu udah bisi bekal letrik.

Ku iya, laluh 2 peratus deka disambung enggau bekal letrik dalam timpuh ke semak tu pengudah pemar ke ditapi diputar.

“Entara pemar iya nya ketegal nadai jalai nuju genturng pendiau enggau mengkang nganti agih belanja ari Perintah Besai iya nya ari Opis Menteri Pemansang Menua Pesisir.

“Enti kededua pemar tu diputar, semua genturung pendiau di Tanjung Datu deka bisi bekal lektrik,”ku Abdul Rahman.

Komitmen tu seraris enggau juluk perintah nengeri ti netapka 100 peratus genturung pendiau di Sarawak deka bisi bekal letrik manggai taun 2025, tandu Abdul Rahman.