Pemesai KPDNHEP udah digerah ngambi bejalaika pengawa mansik pemborong, pemekal ti enda ngubah rega barang

KUCHING: Pemesai Opis Menteri Dagang Dalam Menua enggau Pekara Penguna (KPDNHEP) digerah mansik dawa bekaul enggau ‘pemborong’ sereta pemekal ti enda ngubah rega barang taja pan sifar peratus Chukai Barang enggau Servis (GST) berengkah dipejalaika 1 Jun tu tadi.

Sapit Menteri KPDNHEP, Chong Chieng Jen madahka piak iya deka nasat pekara nya nyengkaum ngena undangundang nitihka Akta Kawalan Harga dan Anti Pencatutan 2011.

“Kami (Pemesai KPDNHEP) deka datai meresa sereta mansik pasal pekara tu ke pengelantang penguna.

“Enti dawa nya amat nyadi, siti langkar kereja undangundang deka diberikelala dikena mutarka penanggul tu,” ku iya.

Iya mansutka pekara nya lebuh dikerandau raban pengarang bnerita pengudah nemuai seraya gawa keterubah iya ba Pasar Komuniti Stutong ditu, kemari.

Sama bisi datai Direktor KPDNHEP Sarawak, Datuk Stanley Tan enggau Sapit Direktor KPDNHEP Sarawak, Md Nawawi Abd Rahman.

Chong madahka, chara nya siti ari inisiatif tikena nagang orang dagang meri rega barang ti enda patut ketegal pemborong ke nadai nukar rega barang taja pan GST udah sifar peratus.

Berebak enggau tu iya madahka opis menteri iya meri kelala polisi ‘ Zero Waste’ di serata menua berengkah ujung taun tu.

Antara tuju polisi nya ku iya, dikena nagang tauka mutarka penangul besibil ba subsidi ke nyadi sebedau tu.

“Nyendiaka subsidi ngagai rabang ke dikena tiap hari baka minyak bepanduk, minyak diesel enggau gis petroleum belaie (LPG) sereta ke bukai ti salah guna sereta enda datai ba raban ditagit.

“Tu nyadi ketegal orang tengah ti ngambi untung lebih ari ke patut,” ku iya.

Ngenang penemuai seraya gawa nya kemari, Chong madahka, rega barang ba Pasar Komuniti Stutong stabil.

“Bepelasarka penemuai aku ke ngabas kitu sehari tu kitai dipadahka berang ke dijual orang dagang ditu majak manah pengudah sifar peratus GST.

“Naka ke diatu nadai nerima sebarang sebana ari mensia mayuh pasal rega barang niki ba Pasar Komuniti Stutong,” ku iya.

Kami (Pemesai KPDNHEP) deka datai meresa sereta mansik pasal pekara tu ke pengelantang penguna. Chong Chieng Jen Sapit Menteri KPDNHEP

— Gambar Muhd Rais Sanusi SELAMAT DATAI: Siku ari ketuai raban bansa ke sama enggau ngambat penatai Tun Mahathir, betabi seraya meri selamat datai ngagai Tun Mahathir, kemari.

MERI PENERANG : Chong bejaku dalam aum pengarang berita pengudah penemuai keterubah iya ba Pasar Komuniti Stutong di Kuching, kemari. Bisi datai, Kaban Parlimen Bandar Kuching, Dr Kelvin Yii, Kaban Kunsil Nengeri (ADUN) Pending, Violet Yong, Stanley...