Tun Mahathir nemuai seraya gawa dua hari ke Kuching
KUCHING: Menteri Besai Tun Dr Mahathir Mohamad nemuai seraya bejalaika pengawa ke mengeri besai Kuching pengelama dua hari, lalu mulaika diri ke Kuala Lumpur sehari tu.
Penatai Tun Mahathir kemari iya nya penemuai keterubah pengudah dipilih nyadi Menteri Besai Malaysia Ke-7, lepas Pakatan Harapan (PH) ti diiring iya menang ba Pengawa Bepilih Besai Ke-14.
Penatai iya disempulang bini iya Tun Dr Siti Hasmah Mohamad Ali, lalu penatai seduai ba Padang Bilun Antarabansa Kuch- ing (LTAK) urung pukul 10.15 pagi kemari disambut Sapit Kepala Menteri Datuk Amar Douglas Uggah Embas enggau bini iya, Datin Amar Doreen Mayang.
Sama enggau ngambat penatai seduai iya, Menteri Wang Kedua Dato Sri Wong Soon Koh, Sekretari Perintah Nengeri Tan Sri Datuk Amar Mohamad Morshidi Abdul Ghani, Sapit Menteri Dagang Dalam Nengeri enggau Pekara Penguna ti mega Chairman Pakatan Harapan (PH) Sarawak Chong Chieng Jen, orang dagang Tan Sri Tan Pek Khiing, bala ketuai opis perintah sereta ba ketuai raban bansa enggau ke bukai.
Sehari tu, dipelabaka Tun Mahathir bisi betemu enggau Kepala Menteri Datuk Patinggi Abang Johari Tun Openg ba Wisma Bapa Malaysia, sebedau pulai ke Kuala Lumpur.
Malam tadi, Tun Mahathir enggau Tun Hasmah dipelabaka ngulu pengerami nikah uchu Tan Sri Leo Monggie Irok iya nya Diana Dayang Moggie, ba Santubong.
Leo sebedau tu kala nyadi menteri jeman Tun Mahathir nyadi Menteri Besai Malaysia Ke-7. Leo mega kala nyadi Presiden Parti Bansa Dayak Sarawak (PBDS).
Diatu Leo nyadi Chairman Tenaga Nasional Bhd. KUCHING: Ex-chalun Pakatan Harapan (PH) di Parlimen P202 Sri Aman, Norina Umoi Utot bisi ngulu pengerami ngiling bidai enggau Ramah Tamah Hari Raya di tiga genturung pendiau di Sri Aman bedau lama tu tadi.
Pengerami diatur di Rh Nyambar, Empili Tengah, Rh Joel Tanjung Bijat Ai enggau di Rh Jali, Empelanjau, sereta berami enggau bansa Melayu di Kpg Baur, Tanjung Bijat.
Ba pengerami ke mega bisi digulu urung 25 iku tuai rumah ari mayuh bengkah genturung pendiau, Norina ba jaku iya minta peranak Sri Aman meri kerejasama ngagai Perintah baru Pakatan Harapan (PH).
“Semua rayat nyengkaum sida ketuai kaum meseti ngetu bepolitik lalu meratka atur ngemansang kandang menua pesisir,’ku iya.
Ba pengerami nya mega, Norina bisi nyuaka bantu “projek pensel “ngagai bala nembiak di Tanjung Bijat, Empili sereta Empelanjau, Lachau.
Iya pechaya pemansang runding ditempa asil pengelandik ba pekara pelajar.
“Ari pengelandik ba pekara pelajar, komuniti ulih besemekih sereta ulih ngangkatka pemisi tetiap ruang bilik kelebih agi sida ke diau di menua pesisir.
“Pelajar nyadi senyata baru ke nyata ulih ngangkatka ikas runding tetiap komuniti lalu semua nya bepun ari sebatang pensel enggau seiti bup,’ku Norina.
Pengerami di Tanjung Bijat Ai(Tr Joel Kion) bela digulu Ketuai Direktor Lembaga Lada Hitam Sarawak, Dr Harry Entebang.
Iya(Dr Harry) ba jaku ngagai bala pengabang ngelalau peranak Sri Aman meri kere- jasama ngagai Lembaga Lada lalu nyereta projek nanam lada kebun besai.
Bantu ba pengawa numbuhka kebun lada ku iya tau dipinta ari ijinsi perintah ke bekaul.
“Lembaga Lada Hitam Malaysia deka ngadu kerejasama enggau Perintah Pakatan Harapan lalu deka nentuka semua subsidi bantu lada datai ba rayat di menua pesisir di serata Sarawak sereta Sri Aman,’ku Dr Harry.