Undang-undang nagang nembiak baruh umur nikah patut dituku ba aum parlimen

KUCHING: Bagi Orang Indu Parti Keadilan Rakyat (PKR), minta Opis Menteri Orang Indu, Ruang Bilik enggau Pemansang Komuniti ngenuku undang-undang nagang nembiak baruh umur nikah tumu ba aum parlimen tu.

Mandal Ketuai Orang Indu PKR, Voon Shiak Ni madah enda setuju enggau opis menteri nya ti ngenuku ‘standard operating procedure’(SOP) ba atur meri pemendar pengawa nikah baruh umur nengah Kort Syariah.

“Ngenuku SOP ba atur meri pemendar pengawa nikah baruh umur nengah Kort Syariah balat ngalitka ati aku.

“Aku mantah pemutus tu lalu pekara ke patut digaga opis menteri iya nya ngenuku undang-undang nagang nembiak baruh umur nikah,”ku iya ba aum pengarang berita di Kuching kemari.

Sekretari Politik opis menteri nya, Rodziah Ismail neritka SOP nya pengudah kes siku lelaki beumur 41 taun ke jadi enggau siku nembiak indu beumur 11 taun di Kelantan.

Nitihka penerang Voon, Undang-Undang Ruang Bilik Islam ba tetiap nengeri netapka ikas umur minimum lelaki tau nikah 18 taun lalu ungkup orang indu 16 taun.

“Aku enggau terang madah enti pekara tu dilak nyadi, kitai engka enda ngenah enggau adil ba sentang kuing pengidup nembiak nya jemah ila.

“Nembiak nadai daya deka madah enggai, sida agi nembiak sereta bedau nemu bepikir panjai,”ku Voon ke mega Ketuai Bagi Orang Indu PKR Sarawak.

SOP nya ku Voon nambah baka ke meri pemendar ngagai nembiak baruh umur nikah lalu tau ngemaruh opis menteri ba mata mensia mayuh.

“Opis menteri baka ke ny- ukung pengawa nya lalu enda seraris enggau aspirasyen perintah baru Pakatan Harapan (PH) ti deka ngangkatka status sosial enggau ekonomi orang indu di menua tu,”ku iya.

Aku nyukung pinta nagang nembiak baruh umur nikah tumu lalu pekara tu meseti dikemetul ba parlimen Malaysia, tandu Voon.

Bela datai ba aum pengarang berita nya Kaban Kunsil Nengeri(ADUN) Batu Lintang See Chee How.