Bisi 337 kes mungkur mayuh penyalah dirikod KPDNHEP
KUCHING: Bisi 337 kes ti mungkur mayuh penyalah enggau penyampau rega ke dirampas RM406,272 dirikodka Opis Menteri Dagang Dalam Nengeri enggau Pekara Penguna ( KPDNHEP) Sarawak berengkah ari 1 Januari ngagai 13 Julai taun tu.
Direktor KPDNKHEP Sarawak, Datuk Stanley Tan madahka sepemanjai timpuh ke sama, piak iya mujur ngumpul kompaun sepenyampau RM39,100.
“Nya asil ari operasi meresa Pemesai Penerit Adat KPDNHEP Sarawak ba 36,011 premis serata nengeri ti nyengkaum 31,314 premis di kandang mengeri enggau 4,694 premis di menua pesisir dalam timpuh 1 Januari ngagai 13 Julai taun tu,” ku iya.
Iya madahka pekara nya ngagai pengarang berita pengudah nyereta pengawa nemuai seraya gawa Sapit Menteri KPDNKHEP, Chong Chieng Jen ba Pasar Komuniti Stutong, kemari.
Nitihku Stanley, semua kes nya salam di baruh Akta Kawalan Harga dan Anti Pencatutan 2011, Akta Kawalan Bekalan 1961, Akta Perihal Dagangan 2011, Akta Timbang dan Sukat 1972 enggau Akta Pelindungan Pengguna 1999.
Ku iya, penyalah ti pemadu mayuh dikereja orang dagang iya nya di baruh Akta Kawalan Harga dan Anti Pencatutan 2011 ti bisi 166 kes enggau rega barang ke diarampas RM25,429.85 sereta kompaun RM21,050.
“Udah nya ditangkan penyalah di baruh Akta Timbang dan Sukat 1972 ti bisi 107 kes ti ngerikutka rega dirampas sepnyampau RM18,652 enggau kompaun RM14,350.
“Bisi 46 kes dirikut ketegal penyalah dibaruh Akta Perihal Dagangan 2011 enggar rega berang dirampas sepenyampau RM260,509 sereta kompaun RM3,700,” ku iya.
Lalu penyalah di baruh Akta Kawalan Bekalan 1961, ku Stanley, bisi 14 kes mujur dirikutka enggau rega barang ke dirampas sepenyampau RM100,509.45 lalu nadai kompaun diberi.
“Kelimpah ari nya, di baruh Akta Perlindungan Pengguna 1999, kitai mujur ngerikut empat kes enggau penyampau rega barang ke dirampas sepenyampau RM 1,171.70 sereta nadai dikelaurka kompaun,” ku iya.