Tu beduduk ari rega barang mengkang niki taja perintah Pakatan Harapan udah ngaga pemutus madamka GST berengkah 1 Jun tu tadi

KUCHING: Opis Menteri Dagang Dalam Nengeri enggau Pekara Penguna (KPDNHEP) Sarawak nerima 103 sebana ari penguna bekaul enggau rega barang niki pengudah sifar peratus Chukai Barang enggau Servis (GST) dipejalaika 1 Jun tu tadi.

Direktor iya, Datuk Stanley Tan madahka, penyampau sebana(aduan) ti diterima opis menteri nya ari timpuh 1 Jun ngagai 12 Julai, apin lama.

“Ari penyampau nya, bisi 102 sebana mujur diputarka nengah meri notis enggau jaku tangkan ngagai orang dagang, lalu siti kes sebana bedau diputarka,” ku iya.

Iya mansutka pekara nya lebuh dikerandau raban media pengudah nyempulang penemuai seraya gawa ti keterubah Sapit Menteri KPDNHEP, Chong Chieng Jen ba Pasar Komuniti Stutong ditu, kemari.

Ngenang silik pekara nya , Stanley madahka opis menteri udah ngeluarka 17 notis di baruh Seksyen 21 enggau 44 notis di baruh Seksyen 5 (3A) Akta Kawalan Harga dan Anti Pencatutan 2011 ngagai orang dagang ti ngereja penyalah nya.

“Bisi mega orang dagang ti nerima kededua notis nya laban ke ditemu ngereja dua penyalah di baruh akta nya,” ku iya.

Kelimpah ari nya ku iya, piak iya mega ngeluarka 48 amaran ngagai orang dagang ngambika enda nikika rega barang pengudah GST sifar peratus.

“Naka ke diatu, kitai udah meresa 1,235 premis dagang ti dipejalaika 205 kaban pemesai KPDNHEP ba serata nengeri tu dikena ngenukuka semua orang dagang nitihka polisi sifar GST,” ku iya.

Ari penyampau nya, bisi 102 sebana mujur diputarka nengah meri notis enggau jaku tangkan ngagai orang dagang, lalu siti kes sebana bedau diputarka. Datuk Stanley Tan Direktor KPDNHEP Sarawak