PALS majak ngerembai, 363 sekula udah numbuh kelab
MUKAH: Kelab Pencinta Alam Sekitar (PALS) majak ngerembai kenyau iya dipejalaika dalam taun 1999, pia ku Sapit Kontroler Rampa Menua Opis Kunsil Pengeraja Asal enggau Rampa Menua (NREB) Sarawak, Justine Jok Jau Emang.
Kenu ku iya, dipun enggau 74 buah sekula pemungkal dalam taun nya, diatu sepenyampau 363 buah sekual primari enggau sekondari di Sarawak udah numbuhka Kelab PALS.
“Tuju kelab tu ngambika bala nembiak sekula ngulihka penemu, pengelandik enggau pemanah pekara ba rampa menua. “Tu nengah pejalai aktiviti bekaul ti dipejalai maya atur aktiviti kelab di sekula sida empu,” ku iya rambau Pengawa Nutup Gempuru Besai PALS Renggat Nengeri Sarawak 2018 di Kingwood Resort ditu, kemari.
Gempuru tu diatur empat hari berunggu kenyau ari 10 Julai tu tadi.
Nya alai, Justine meransang tetiap iku nembiak sekula nambahka penemu sida bekaul enggau rampa menua ngambika nyadi orang ti siru agi ke rampa menua.
“Ke amat, semua tu bepanggai ba pilih diri empu sereta mega sedia deka berubah,” ku iya nerang.
Penemu enggau ulah patut seriris nentuka ulih nyapai juluk nya, ku iya.
Gempuru sekali tu berambaika jaku ‘Save It or Waste It - The Choise Is Yours.’
Iya diatur NREB Sarawak begulai enggau Sarawak Energy enggau kerejasama Opis Pelajar Nengeri Sarawak.
Sama bisi datai Menijar Bagi Pekara Rampa Menua ( HSSE) Sarawak Energy Mahmood Long.